ە. ىدىرىسوۆ: قازاقستانداعى تومەن بايىتىلعان ۋران بانكى جاھاندىق يادرولىق قاۋىپسىزدىكتى نىعايتۋدا اۋقىمدى ۇلەس قوسادى

بۇل تۋرالى بۇگىن اتالعان بانكتى قۇرۋ تۋرالى كەلىسىمگە قول قويىلعاننان كەيىن قازاقستان اتىنان ق ر سىرتقى ىستەر ءمينيسترى ەرلان ىدىرىسوۆ ءمالىم ەتتى.
«ءبىز جاڭا عانا الەمدىك اۋقىمداعى وقيعاعا كۋاگەر بولدىق، سەبەبى بانكتى قۇرۋ قاۋىپسىزدىكتىڭ بىرەگەي تەتىگى بولعاندىقتان، ول تاريحي ماڭىزدىلىققا يە. بانك ماگاتە مۇشەلىگىندەگى ەلدەر ءۇشىن تومەن بايىتىلعان ۋرانعا كەپىلدىك بەرەتىن بىرەگەي تەتىك. تومەن بايىتىلعان ۋران بانكى اتوم ەنەرگەتيكاسىنىڭ بەيبىت تۇردە دامۋىنا قىزمەت ەتەدى جانە جاھاندىق يادرولىق قاۋىپسىزدىكتى نىعايتۋدا ايتارلىقتاي اۋقىمدى ۇلەس قوسادى»، - دەدى مينيستر.
وسى ورايدا ە. ىدىرىسوۆ بۇگىن بەكىتىلگەن تاريحي كەلىسىمگە قول جەتكىزۋ ءۇشىن جۇرگىزىلگەن كەلىسسوزدەرگە ۇلكەن كەمەڭگەرلىك، باتىلدىق، كۇش- جىگەر جۇمسالعانىن قاداپ ايتتى.
بۇدان بۇرىن حابارلانعانداي، بۇگىن استانادا قازاقستان ۇكىمەتى مەن اتوم ەنەرگەتيكاسى جونىندەگى حالىقارالىق اگەنتتىك (ماگاتە) ەلىمىزدىڭ اۋماعىندا تومەن بايىتىلعان ۋراننىڭ بانكىن قۇرۋ تۋرالى كەلىسىمگە قول قويىلدى. اتاپ ايقاندا، بانك ش ق و- داعى ءۇلبى مەتاللۋرگيالىق زاۋىتىنىڭ اۋماعىندا ورنالاسادى. وندا اتوم ەنەرگەتيكاسىنىڭ قاجەتتىلىگى ءۇشىن پايدالانىلاتىن تومەن بايىتىلعان ۋران ساقتالادى.
اۆتور: رۋسلان عابباسوۆ