قازاقستاننىڭ ەڭ ادەمى كەلىنشەگى كىم؟

الماكەزەك اۋىسقان دۇنيە قانشا قۇبىلسا دا، كۇندەلىكتى ءومىردى كەلىنسىز ەلەستەتۋ مۇمكىن ەمەس. كەرەگەلەر كەلىنمەن كەڭەيىپ، شاڭىراق بيىكتەي بەرەدى. الايدا كەلىننىڭ ءبارى بىردەي ەمەستىگىن ءومىردىڭ ءوزى دالەلدەپ، وسىعان وراي اتا- بابالارىمىز ايتارىن ايتىپ، ونەگەنىڭ ۇلى جولىن ەرتەدە- اق كورسەتىپ كەتكەن.
قازىرگى كەلىندەردى بۇرىنعى كەلىندەرمەن سالىستىرۋعا كەلمەس. جاراتىلىسى ايەل بولعانمەن، ءبىلىمى مەن بىلىگى مول ارۋلاردىڭ تىرلىگى دە مىقتى بولسا دەگەن وي جۇرتتىڭ ءبارىن مازالايدى. ويتكەنى اتى تاريحتا قالعان دانا ايەلدەردىڭ ءتالىمى مول تاربيەسىن سىلكىپ تاستاپ، تۇلعاعا اينالعان اقجاۋلىقتىلاردىڭ قاتارى ازايىپ بارا جاتقانداي كورىنەدى كەيدە.
كەلىن - وتباسىنىڭ دىڭگەگى. ولار قىز اتاۋلى ءۇشىن مەكتەپ بولۋى كەرەك- اق. ەرتەدە كەلىندەر تۇسكەن ۇيىندە اتاسى مەن اپاسىنان باستاپ، قىزىلشاقاسىنا دەيىن اتىن تۇسپالداپ اتاپ، وزدەرى قويعان اتپەن ءومىر بويى اتاپ وتەتىن ءداستۇر قۇرمەت پەن سىيلاستىقتىڭ التىنعا ايىرباستاماس ۇلگىسى بولدى.
شۇكىر، زامان قانشا وزگەرسە دە، ۇلتتىق قۇندىلىقتاردىڭ قادىرىن بارىنەن جوعارى قوياتىن ءبىر- ءبىر ءۇيدىڭ جاس كەلىندەرى ەل اراسىندا كوپ دەپ ويلايمىز. سولاردىڭ قاتارى كوبەيە بەرسىن دەيىك. وسى ورايدا «ەڭ ادەمى كەلىنشەك» بايقاۋىن ۇيىمداستىرعاندا ءجون كوردىك.
قاتىسۋشىلارعا قويىلاتىن تالاپتار:
جاسى 40 قا دەيىنگى كەلىندەر. ولاردىڭ ۇلتتىق سالت- ءداستۇردى قالاي ۇستاناتىندىعىن، كەلىن بوپ تۇسكەن العاشقى كۇننەن اتا- ەنەسىنىڭ كوڭىلىن تابۋ ءۇشىن قولدانعان ارەكەتىن، بالالارىن تاربيەلەۋدەگى ونەگەلى جاقتارىن، كۇيەۋىنە دەگەن سىيلاستىعىن، تۋىستارىنا دەگەن قۇرمەتىن قاعازعا ادەمىلەپ ءتۇسىرىپ، [email protected] ەلەكتروندى پوشتاسىنا جولداڭىزدار.
قىزىقتى دا اسەرلى، كولەمى 2 بەت شاماسىنداعى مازمۇندى ماقالالاردى كەيىپكەردىڭ توسىننان تۇسىرىلگەن سۋرەتىمەن بىرگە قابىلدانادى.
قازاقستاننىڭ ەڭ ادەمى كەلىنشەگى تاۋەلسىزدىك كۇنى مەرەكەسى قارساڭىندا انىقتالادى. ۇمىتكەرلەر تۋرالى ماقالا مەن ولاردىڭ سۋرەتتەرىن «ايقىننىڭ» سايتىنان جانە باسىلىمنىڭ الەۋمەتتىك جەلىلەردەگى پاراقشالارىنان وقىپ، سۋرەتىن كورە الاسىزدار.
ەڭ ادەمى كەلىنشەكتەردى سىيلىقتار كۇتىپ تۇر.
«ايقىن»