ەكسترەميزم مەن لاڭكەستىك بۇگىنگى كۇننىڭ قاۋىپتى كورىنىسى بولىپ تۇر - ا. داۋىلبايەۆ

«قىلمىسپەن كۇرەس ماسەلەسى بارلىق مەملەكەتتەر ءۇشىن بىردەي وزەكتى. ءبىزدىڭ شىندىعىمىز مىناداي: ەكسترەميزم مەن لاڭكەستىك قازىرگى ۋاقىتتىڭ ەڭ قاۋىپتى كورىنىسى بولىپ وتىر. ولار ادامداردىڭ ءومىرى مەن دەنساۋلىعىنا، قاۋىپسىزدىگىنە قاۋىپ توندىرۋدە. بۇل قاۋىپتەردىڭ شەكاراسى جوق»، - دەپ اتاپ ءوتتى ول.
ق ر باس پروكۋرورى ەكسترەميزم مەن لاڭكەستىكتىڭ حالىقارالىق سيپاتقا يە بولعانىن جانە اسكەري قۋاتى مەن ءدىني سەنىمىنە قاراماستان، بارلىق مەملەكەتتىڭ الدىندا تۇرعان سىن- قاتەر ەكەنىن باسا اتاپ ءوتتى.
«باسقا ازاماتتار مەن قوعامنىڭ مۇددەسىنە ءوزىن قارسى قويا وتىرىپ، راديكالدى كوڭىل- كۇيدەگى تۇلعالار ىمىراسىز ءارى ادامي قۇندىلىقتان تىس ۇستانىمدى ۇستانىپ وتىر. قوعامنىڭ جاھاندانۋى ەكسترەميستەر مەن لاڭكەستەردىڭ تاسىلدەرىن، قىزمەتىن، ماقساتتارىن وزگەرتىپ جىبەردى. سونىمەن قاتار ولاردىڭ نىساندارى مەن ماقساتتارى دا وزگەردى. ال ودان ءبىزدىڭ عالامشاردىڭ بەيبىت تۇرعىندارى مەن بالالار زارداپ شەگۋدە»، - دەدى ا. داۋىلبايەۆ.
قازاقستاندا 21 ۇيىم ەكسترەميستىك جانە لاڭكەستىك دەپ تانىلدى.
«سوت تارتىبىمەن 21 ۇيىم ەكسترەميستىك جانە لاڭكەستىك دەپ تانىلىپ، ولاردىڭ قىزمەتىنە رەسپۋبليكا اۋماعىندا تىيىم سالىنعان. سونىمەن قاتار سوت ارقىلى سيريا مەن يراكتاعى لاڭكەستەردىڭ قاتارىنا قوسىلۋعا شاقىرعان ۆيدەو روليكتەر دە زاڭسىز دەپ تانىلدى»، - دەدى ول.
ا. داۋىلبايەۆتىڭ اتاپ وتۋىنشە، ەكسترەميستىك مازمۇنداعى ماتەريالداردىڭ عالامتور ارقىلى تارالۋىنا بايلانىستى شامامەن 660 اقپاراتتىق ماتەريال مەن 700 سايتتىڭ ونىمدەرىن جاريالاۋعا جانە تاراتۋعا تىيىم سالىنعان.
«قازاقستان باسقا ەلدەردىڭ تاجىريبەسى نەگىزىندە ءداستۇرلى ەمەس ءدىني اعىمداردىڭ ىقپالىنا ەرگەن ادامداردى الەۋمەتتىك وڭالتۋ جۇمىستارىن جۇرگىزۋدە. الدىن الۋ شارالارى باس بوستاندىعىنان ايىرۋ ورىندارىنداعى ءدىني راديكالداردىڭ جارتىسىنان استامىنىڭ ۇستانىمدارىن وزگەرتۋگە سەپتىگىن تيگىزدى. دەگەنمەن، ەكسترەميزم مەن لاڭكەستىك ءقاۋپى تومەندەر ەمەس» ، - دەدى ق ر باس پروكۋرورى.
اۆتور: مارلان جيەمباي