17:22, 26 - تامىز 2015 | GMT +5
جىلانمەن سەلفي جاساعان امەريكالىق اۋرۋحاناعا ءتۇستى
استانا.قازاقپارات - كاليفورنيا شتاتىنداعى لەيك- ەلسينور قالاسىنىڭ تۇرعىنى ۋلى جىلانمەن سەلفي جاساعىسى كەلگەن ەكەن. ءبىراق جىلان «سۋرەتكە تۇسكەندى» ۇناتپاسا كەرەك، ەر ادامنىڭ قولىن شاعىپ العان، دەپ حابارلايدى Bnews.kz ءتىلشىسى.

Lenta.ru تاراتقان اقپاراتقا سايكەس، 36 جاستاعى الەكس گومەس ءبىر مەترلىك جىلاندى ءوزىنىڭ وتباسىلىق رانچوسىندا بايقاپ قالىپ، ونىمەن سەلفي جاساۋعا ۇيعارادى. جىلاندى قولىنا الىپ، سۋرەتكە تۇسەيىن دەپ جاتقان كەزدە ول گومەستى شاعىپ العان. بۇدان كەيىن ەر ادامنىڭ قولى قاتتى ءىسىپ، بۇكىل دەنەسى شانشىپ اۋىرا باستايدى. گومەستى اۋرۋحاناعا جەتكىزگەننەن كەيىن دارىگەرلەر وعان جىلاننىڭ ۋىن قايتاراتىن ءدارى بەرگەن. دەگەنمەن، ەر ازاماتتىڭ اناسىنىڭ ايتۋىنشا، بالاسى قولىنان ايىرىلۋى مۇمكىن، ويتكەنى ول ءشىري باستاعان.
كاليفورنيادا جىل سايىن ۋلى جىلاندار 800 گە جۋىق ادامدى شاعادى ەكەن. ولاردىڭ ءبىر- ەكەۋى كوز جۇمادى. جىلاندار، اسىرەسە، ءساۋىر- قازان ايلارىندا ەرەكشە بەلسەندىلىك تانىتادى.
ايىمگۇل ابىلەۆا