سۋرەتكە ءساتتى ءتۇسۋدىڭ ءادىس- تاسىلدەرى

نۇر-سۇلتان. قازاقپارات - ءار ادام سۋرەتتەردەن ءوزىنىڭ ءساتتى تۇسكەن كەلبەتىن كورە الادى. ول ءۇشىن تەك قانا ءساتتى تۇرىس، دۇرىس جارىق جانە سۇيكىمدى بەت- الپەت قاجەت.

1. باسىڭىزدى بۇرىڭىز. كامەراعا تۋرا قاراپ تۇسكەن جاعدايدا بەتىڭىز ۇلكەيىپ كورىنۋى ابدەن مۇمكىن. سوندىقتان ازىراق بولسا دا بۇرىلىپ، بولماسا ءسىزدى ءتۇسىرىپ جاتقانىن بايقاماعان كەيىپ تانىتىڭىز. ايتا كەتەتىن جايت، سىرت قاراعاندا، ادامنىڭ سول جاق دەنەسى مەن بەتى «جاقسى جاعى» بولىپ سانالادى.

2. موينىڭىزدى سوزىڭىز. ەگەر سۋرەتتە بۇكىر نەمەسە قيسىق بولىپ كورىنگىڭىز كەلمەسە، موينىڭىزدى سوزىپ جانە باسىڭىزدى العا ءسال جىلجىتىپ تۇسكەنىڭىز ابزال. بۇل ءتاسىل ارقىلى ءسىز قوس بۇعاقتىڭ پايدا بولۋىنان دا ارىلا الاسىز.

3. يەگىڭىزدى ءتۇسىرىڭىز. موينىڭىزدى سوزىپ تۇرعانىڭىزبەن، يەگىڭىزدىڭ تومەنگە باعىتتالۋىن قاداعالاڭىز. كوتەرىڭكى يەككە قاراعاندا، بۇعىنىڭقى يەك كەلبەتىڭىزدى كورىكتى ەتە تۇسەدى. سەنبەيسىز بە؟ سەلفي جاساپ كورىڭىز.

4. ءتىلىڭىزدى تىستەرىڭىزدىڭ اراسىندا ۇستاڭىز. كۇلگەندە تىستەرىڭىزدى كورسەتۋدەن جاسقانباڭىز. جىميىپ تۇسسەڭىز ءتىپتى ادەمى كورىنەسىز، ءبىراق ەزۋىڭىز ءسال اشىق بولسا، قۋانىشقا تولى كوڭىل- كۇيىڭىز بايقالىپ، سۋرەت ارلەنە تۇسەدى. ءتىلىڭىزدى تىستەرىڭىزدىڭ اراسىندا ۇستاپ تۇرۋ ارقىلى، ەزۋىڭىزدىڭ قانشالىقتى اشىق بولۋىن قاداعالاي الاسىز.

5. جارىققا تۋرا قاراڭىز. كامەرانىڭ الدىندا تۇرعاندا جارىق بەرىلەتىن نۇكتەگە تۋرا قاراڭىز. بۇل ءسىزدى «قىزىل كوز» ەففەكتىسىنەن ساقتاپ قالادى جانە جانارىڭىز جايناپ، ومىردەگىدەن دە تارتىمدى بولىپ شىعاسىز.

6. كۇلىڭىز. ەڭ ءساتتى سۋرەت - تابيعي، شىنايى سۋرەت. ەگەر جاساندى كۇلكىمەن تۇسسەڭىز، ول بىردەن بايقالىپ قالادى. سول سەبەپتى سۋرەتكە ءتۇسىرىپ تۇرعان دوسىڭىزعا شىنايى كۇلىپ نەمەسە ويعا باتىپ وتىرعان ءساتتى ءتۇسىرىپ الۋىنا ءوتىنىش ايتىڭىز.

7. ەسكى سۋرەتتەرىڭىزدى ءبىر قاراپ شىعىڭىز. بارلىق جاعدايدا قاتەمەن جۇمىس جاساعاننان جاقسى شەشىم جوق. ءوزىڭىزدىڭ قالاي تۇرعانىڭىزدى، كوڭىل- كۇيدىڭ قانداي ەكەنىنە كوڭىل ءبولىڭىز. بولاشاقتا فوتوعا تۇسكەندە سونى ەسكەرىڭىز. بىرەۋگە سالقىنقاندى بەينە، ال بىرەۋگە كۇلىپ تۇسكەن جاراساتىنىن ەستەن شىعارماڭىز.

ءسىز ءوزىڭىزدى سۋرەتكە ناشار تۇسەمىن دەپ ويلايسىز، ال بايقاۋسىزدا ءتۇسىپ قالعان سۋرەتتەگى كەلبەتىڭىز وزىڭىزگە ۇناي ما؟ دەمەك، ءسىز دە سۋرەتكە جاقسى تۇسەتىن ادامداردىڭ قاتارىنا كىرەسىز. تەك كامەرا الدىندا ءوزىڭىزدى دۇرىس ۇستاساڭىز بولعانى. شىنايى بولۋدى ۇمىتپاڭىز، شىنايىلىق ءار كەزدە دە ادەمى.

«جاس الاش» گازەتى