حان ورداسىندا وتكەن رەسپۋبليكالىق ايتىستا بوكەي وردالىق جانسايا مۋسينا توپ جاردى
قازىلار القاسىنىڭ شەشىمى بويىنشا بوكەي ورداسى اۋدانىنان قاتىسىپ، وسى ايتىستا جارقىراي كورىنگەن جانسايا مۋسينا باس جۇلدەنى (1,5 ميلليون تەڭگە) جەڭىپ الدى. اراعا ون جىل سالىپ، دوداعا قايتا قوسىلعان، قازتالوۆ اۋدانى جالپاقتال توپىراعىنان تۇلەپ ۇشقان، قازىر استانا قالاسىندا تۇراتىن جىبەك بولتانوۆا ءبىرىنشى جۇلدەگە (1 ميلليون تەڭگە) لايىق دەپ تابىلدى. ارقالىق قالاسىنان كەلگەن ارقالى اقىن ايبەك قاليەۆ پەن استانالىق اسەم ەرەجە قىزى - ەكىنشى، قىزىلوردالىق مۇحتار نيازوۆ پەن ب ق و- نىڭ جانىبەك اۋدانىنان شىققان مۇرادىم ميرلانوۆ ءۇشىنشى ورىندى يەلەندى. قاتىسقان بارلىق اقىندارعا ىنتالاندىرۋ سىيلىقتارى تابىس ەتىلدى. سونىمەن قاتار باتىسقازاقستاندىق سەگىز اقىنعا وبلىس اكىمىنىڭ ستيپەندياسى تاپسىرىلدى.
ايتىستىڭ جابىلۋ راسىمىندە وبلىس اكىمىنىڭ ورىنباسارى باقتيار ماكەننىڭ اتاپ وتكەنىندەي، قازاق حاندىعىنىڭ 550 جىلدىعىنا ارنالعان شارالار ەلىمىزدىڭ باتىسى مەن شىعىسىندا، وڭتۇستىگى مەن سولتۇستىگىندە ۇيىمداستىرىلىپ، ەل ەڭسەسىن كوتەرە تۇسۋدە. 26 - تامىز كۇنى حان ورداسى اۋىلىندا قازاقستان مەن رەسەي عالىمدارىنىڭ قاتىسۋىمەن بولاتىن «تاريح قويناۋىنان قازىرگى زامانعا دەيىن» اتتى حالىقارالىق عىلىمي- تاجىريبەلىك كونفەرەنتسياعا ۇكىمەت باسشىسىنىڭ ورىنباسارى بەردىبەك ساپاربايەۆ پەن وبلىس اكىمى نۇرلان نوعايەۆ قاتىسپاقشى.
قازىلار القاسىنىڭ ءتوراعاسى، اتى التى الاشقا ءمالىم ونەر تارلانى اسانالى ءاشىموۆتىڭ ايتۋىنشا، حان ورداسىنداعى ايتىس كوپشىلىك كوڭىلىنەن شىقتى. اقىندار ەلدىڭ كوكەيىندە جۇرگەن كەلەلى ماسەلەلەردى قوزعاي ءبىلدى. سونىڭ ىشىندە حاندارىمىز بەن باتىرلارىمىزدى، باسقا دا ۇلى تۇلعالارىمىزدى قاستەرلەپ، ەسىمدەرىن ماڭگى ەستە قالدىرۋ، ەلدىڭ بۇتىندىگى مەن تىنىشتىعىن ساقتاپ، شەكاراسىن نىقتاۋ، جاڭگىر ىرگەسىن قالاعان، وبلىس ورتالىعىنان 550 شاقىرىم قاشىقتىقتا جاتقان حان ورداسىنا تاقتاي تەگىس جول سالۋ سىندى وزەكتى جايتتار ءسوز بولدى.
ايتىستى جۇرگىزگەن ءجۇرسىن ەرماننىڭ حابارلاعانىنداي، قازاق حاندىعىنىڭ 550 جىلدىعىنا ارنالعان ءسوز سايىسى مۇنىمەن بىتپەيدى. وسى ايتىستا جاقسى كورىنگەن باتىسقازاقستاندىق باۋىرجان شيرمەدين ۇلى مەن اتىراۋلىق شالقارباي ءىزباساروۆ 20-21 - قىركۇيەكتە الماتىدا، 1-2 - قازاندا اقتوبەدە وتەتىن رەسپۋبليكالىق دودالارعا جولداما الدى. 
