الماتى مارافونى ناۋقاس بالالارعا ارناپ ستاديون سالىپ بەردى - فوتو
بۇگىن مەكتەپتىڭ الدىندا قوعامدىق ۇيىمدار مەن ەرىكتىلەردىڭ قاتىسۋىمەن جاڭا سپورت نىسانىنىڭ سالتاناتتى اشىلۋ ءوتتى.
سپورت كەشەنىنىڭ قۇرىلىسى بيىل ماۋسىم ايىندا باستالعان بولاتىن. ەندى بالالار ءوز ستاديوندارىندا فۋتبول، باسكەتبول جانە ۆولەيبول ويناي الادى. سونىمەن قاتار الاڭعا بەلتەمىرلەر، قىرلى بورەنەلەر جانە باسقا دا سپورت قۇرالدارى ورناتىلعان.
- ءبىز ءۇشىن ەڭ ماڭىزدىسى، كومەككە اسا مۇقتاج بالالارعا قول ۇشىن سوزۋ. بىلەسىزدەر، بيىلعى الماتى مارافونىنا الەمنىڭ 40 ەلىنەن 19 مىڭ ادام قاتىسقان بولاتىن. بىرنەشە اي وتكەن سوڭ جاڭا سپورت كەشىنىن اشىپ وتىرمىز. جاڭا وقۋ جىلىندا سويلەۋ قابىلەتى وتە ناشار بالالار بەلسەندى ويىندار ويناپ، سپورتپەن شۇعىلدانا وتىرىپ، تولىققاندى دامي الاتىن بولادى. مۇمكىن ولاردىڭ كەيبىرى كەلەسى الماتى مارافونىنا قاتىساتىن بولار، - دەدى الماتى مارافونىنىڭ ديرەكتورى سالتانات قازىبايەۆا.
سونداي-اق قايىرىمدىلىق جوباسىنىڭ اۆتورلارى ينتەرناتتىڭ قورشاۋىن قايتا جوندەپ، بوياپ، اكتەپ بەردى.
ايتا كەتەيىك، الماتى مارافونى باستالعالى بەرى جىل سايىن قاتىسۋشىلاردىڭ سانى ارتىپ كەلەدى. 2012 -جىلى جينالعان قارجى سال اۋرۋىمەن اۋىراتىن بالالاردى وڭالتۋ شاراسىنا جۇمسالعان بولاتىن. 2013 -جىلى قارجى مۇگەدەك بالالارعا ارنالعان شاعىن اكۆاتوريي سالۋعا باعىتتالدى. ال 2014 -جىلى قاتەرلى دەرتكە شالدىققان 3 جاسار ءبۇلدىرشىن دارينا ليكتىڭ ەمدەلۋىنە جۇمسالدى.
ءوز كەزەگىندە مەكتەپ- ينتەرناتتىڭ ديرەكتورى يرينا زلوكازوۆا IV الماتى مارافونىنا شەكسىز ريزالىعىن جەتكىزدى.
«№9 مەكتەپ- ينتەرناتىنىڭ ۇجىمى الماتى مارافونىنىڭ قايىرىمدىلىق كومەگىنە شەكسىز العىسىن بىلدىرەدى. جاڭا سپورت الاڭىنا وتە مۇقتاج ەدىك. بۇل ستاديون وقۋشىلارىمىزدىڭ دەنساۋلىعىن نىعايتۋعا، دەنە تاربيەسى ساباعىن بۇرىنعىدان دا مازمۇندى جۇرگىزۋگە، وقۋشىلار اراسىندا سالاۋاتتى ءومىر سالتىن ناسيحاتتاۋعا كوپ سەپتىگىن تيگىزەتىنى داۋسىز. الماتى مارافونىنا كورسەتكەن كومەگى ءۇشىن، سونىمەن قاتار جارنا تولەپ وسى سپورت كەشەنىنىڭ قۇرىلىسىنا ۇلەس قوسقان بارشا ازاماتتارعا العىسىمىزدى بىلدىرەمىز»، - دەدى ول.
اۆتور: گۇلميرا عوسمانالي
