ەلوردادا ءبىر وقۋشىنى مەكتەپكە دايىنداۋ ءۇشىن قانشا تەڭگە جۇمسالادى؟

استانا. قازاقپارات - ءۇيدىڭ كىشىسى وزىنەن ۇلكەن اعا- اپكەلەرىنىڭ «ەسكىسىن» كيە سالاتىن زامان جوعالىپ بارا جاتىر. مەكتەپ جاسىنداعى بەس- التى بالاسى تەتەلەس وسكەن وتباسىلاردىڭ كوبى ءۇشىن بۇل قۇبىلىس - نوستالگيا.
None
None

ال، قازىر اتا- انا، اسىرەسە، قالاداعى اتا- انا ءار بالاسىن مەكتەپكە جەكە- جەكە دايىندايدى. بۇل ءبىر جاعىنان ەلدەگى الەۋمەتتىك جاعدايدىڭ جاقسارعانى، ونىڭ ۇستىنە، مەكتەپتەردەگى جاڭا تارتىپتەرمەن بايلانىستى دەسەك، ەكىنشى جاعىنان وتباسىندا ءبىر ۇل، ءبىر قىزدان باسقا ءسابي ءۇنى ەستىلمەي قالعان ءبىر كەزدەگى دەموگرافيالىق كەلەڭسىزدىكتىڭ بەلگىسى دە شىعار.

ءبىراق، ءبىزدىڭ بۇگىنگى ايتپاعىمىز دەموگرافيالىق احۋال ەمەس. بۇگىنگى اڭگىمە - بالانى مەكتەپكە دايىنداۋدىڭ اريفمەتيكاسى تۋرالى بولماق. سوندىقتان، 1 - قىركۇيەك قارساڭىندا، استانا قالاسىندا ءبىر وقۋشىنى مەكتەپكە تاس- ءتۇيىن ەتىپ دايىنداۋ ءۇشىن نەشە تەڭگە كەتەدى دەگەن ماسەلە توڭىرەگىندە الەۋمەتتىك تالداۋ جاساۋدى ءجون كوردىك.

 ەڭ الدىمەن، بالانىڭ بويىنا ءبىلىم سىڭىرەتىن - كىتابى. ءبىلىم جانە عىلىم مينيسترلىگى بۇل رەتتە وقۋشىلاردىڭ 98 پايىزعا جۋىعى مەكتەپ باعدارلاماسىنداعى كىتاپپەن تولىق قامتىلعانىن ايتىپ وتىر. ب ع م مەكتەپكە دەيىنگى جانە ورتا ءبىلىم بەرۋ، اقپاراتتىق تەحنولوگيالار دەپارتامەنتىنىڭ ديرەكتورى جاڭىل جونتايەۆا 10 - تامىزدان باستاپ 1- سىنىپ وقۋشىلارىنا جاڭا وقۋ جىلىنىڭ كىتاپتارى ۇلەستىرىلە باستايدى دەگەندى حابارلاعان بولاتىن.

«بارلىق مەكتەپ باسشىلارى، قالالىق، وبلىستىق، اۋداندىق ءبىلىم بولىمدەرىنىڭ باسشىلارى اتا- انالارمەن بىرگە 10 - تامىزدان باستاپ 1-سىنىپ وقۋشىلارىنا وقۋلىقتار تاراتا باستايدى. 10- تامىز كۇنى 1-سىنىپتىڭ وقۋلىقتارىن الۋ ءۇشىن اتا- انالاردى مەكتەپكە كەلۋگە شاقىرامىز. 11 - تامىزدا 2,3-سىنىپتارعا، 12 - تامىزدا 4,5-سىنىپتارعا، ال 18 - تامىزدان باستاپ 11-سىنىپتىڭ بالالارىنا وقۋلىق تاراتىلادى» ، - دەگەن ەدى شىلدە ايىنىڭ سوڭىندا جۋرناليستەردىڭ سۇراعىنا جاۋاپ بەرگەن دەپارتامەنت ديرەكتورى.

 قوش، مەملەكەت وقۋشىلاردى تۇگەلدەي كىتاپپەن قامتىپ وتىر دەلىك. ءبىراق، جاڭىل جونتايەۆا ەسكەرتكەندەي: «مەملەكەت وقۋلىقپەن قامتاماسىز ەتسە دە وسى وقۋلىقتارعا قوسىمشا جۇرەتىن داپتەرلەردى، اتلاس كارتالارىن، وزگە دە قاجەتتىلىكتەردى ساتىپ الىپ بەرۋ اتا- انانىڭ موينىندا». ال، استانا دۇكەندەرىندەگى باعالارعا ساي، ءبىر وقۋشىعا قاجەتتى كانستاۋارلارىن الىپ بەرۋ ءۇشىن ورتاشا 9000 تەڭگە كەتەدى. بۇل  9000 تەڭگە ىشىنە جوعارىدا ايتقان اتلاس كارتالار، قوسىمشا داپتەرلەر مەن جاي داپتەرلەر، قالام، قارىنداشتىڭ قۇنى كىرەدى.

 ال، وسى كىتاپ- قۇرالدارىن سالاتىن سومكەلەردىڭ ورتاشا باعاسى ەلوردا دۇكەندەرىندە 5000 تەڭگەدەن باستالىپ،  25000-  27000 تەڭگەگە دەيىن بارادى. ياعني، ساپاسى جاقسىراق، ءسانى دە كەلىسكەن سومكەلەردى 8000-9000 تەڭگەگە ساتىپ الۋعا بولادى.

 ەندى، كيىم- كەشەك قۇنىنا توقتالساق. جالپى، مەكتەپتەردىڭ ءوزى تالاپ ەتەتىن ارنايى فورمانى تىكتىرۋ ءۇشىن شامامەن 15000-20000 تەڭگە كەتەدى. ال، ەگەر، مەكتەپ فورماسى بولماسا، ەلورداداعى اتا- انالار ۇل بالاسىنا كوستيۋمدى ورتاشا ەسەپپەن 6000 تەڭگەگە، شالباردى 7000 تەڭگەگە، اق جەيدەلەرىن 6000 تەڭگەگە ساتىپ الادى ەكەن. ەر بالالارعا ارنالعان ساپالى سپورتتىق كيىمنىڭ باعاسى 10000-17000 تەڭگە ارالىعىندا. 

 قىز بالالارىمىزدىڭ كيىمدەرىنە دە ساپاسى مەن ساتىلىپ تۇرعان ورنىنا قاراي ءارتۇرلى باعا بەلگىلەنگەن. قىز بالانىڭ بەلدەمشەسىن استانا دۇكەندەرىندە 5000 تەڭگە جانە ودان دا جوعارى باعاعا ساتىپ الۋعا بولادى. اق جەيدەلەرى 6000-7000 تەڭگەدەن ساتىلسا، سپورت ساباعىنا ارنالعان فورمانى  10000 تەڭگەدەن باستاپ  17000 تەڭگە ارالىعىندا ساتىپ الۋعا بولادى.

 ال، وقۋشىلاردىڭ اياق كيىمدەرى ساپاسىنا قاراي 5000 تەڭگەدەن باستالىپ ءتىپتى 20-30 مىڭ تەڭگەگە دەيىن بارادى. ال، قاراپايىم حالىقتىڭ قالتاسى كوتەرەتىن باعا شامامەن 8000 تەڭگە ەكەن. ءبىراق، قازىر بالاڭىزعا ءبىر اياق كيىم از بولادى، سەبەبى، قازىر قالا مەكتەپتەرىنىڭ بارلىعى ەكىنشى اياق كيىم تالاپ ەتەدى. سوندىقتان، ءبىر بالاسىنا قوس اياق كيىم الاتىن اتا- انا جەڭىلدىك تالاپ ەتىپ، 5000-8000 تەڭگەگە ءبىر ماۋسىمعا شىدايتىن اياق كيىم ساتىپ الادى.

 وسىلايشا، استانانىڭ دۇكەندەرى مەن بازارلارىنداعى باعانى بىلە وتىرىپ، ءبىر بالانىڭ مەكتەپكە كەرەك- جاراعى شامامەن نەشە تەڭگە بولاتىنىن وزىمىزشە ەسەپتەدىك. سويتە كەلە، اتا- انا استانا قالاسىندا ءبىر وقۋشى بالاسىن باستان- اياق كيىندىرىپ، كەرەك- جاراعىن تولىق الىپ بەرۋ ءۇشىن ەڭ كەمىندە  50000 تەڭگە جۇمسايتىنىن انىقتادىق. اتا- انالاردىڭ ايتۋىنشا، دۇنيەنى ەڭ ارزان باعامەن الدىم دەگەن كۇننىڭ وزىندە وسىنشا قاراجات كەتەدى ەكەن.

اۆتور: كەنجەكەي توقتامۇرات قىزى

سوڭعى جاڭالىقتار