وڭتۇستىك كورەيا پرەزيدەنتى سولتۇستىك كورەيا بيلىگىنىڭ كەشىرىم سۇراۋىن تالاپ ەتۋدە

استانا. قازاقپارات- سولتۇستىك كورەيا قارۋسىز ايماققا مينا قويعانى ءۇشىن كەشىرىم سۇراۋى ءتيىس. وڭتۇستىك كورەيا پرەزيدەنتى پاك كىن حە كورشىلەرىنە وسىنداي تالاپ قويدى.

 ونىڭ ايتۋىنشا، تەك سوندا عانا سەۋل دىبىس زورايتقىشتار ارقىلى باۋىرلاس مەملەكەتكە قارسى ۇگىت- ناسيحات جۇرگىزۋىن توقتاتپاق.

 ەسكە سالا كەتەيىك، تامىزدىڭ باسىندا ەكى رەسپۋبليكا شەكاراسىنداعى قارۋسىز ايماقتا تەكسەرۋ جۇرگىزىپ جاتقان وڭتۇستىك كورەيانىڭ ەكى ساربازى مينانى باسىپ كەتىپ، اياعىنان ايىرىلعان بولاتىن. سەۋل ول ءۇشىن باۋىرلاس مەملەكەتتى ايىپتاعان. الايدا پحەنيان ونى مويىنداماي وتىر. پاك كىن حە، وڭتۇستىك كورەيا پرەزيدەنتى:

- سولتۇستىك كورەيا كەشىرىم سۇراۋى ءتيىس. جانە شەكارادا كەز كەلگەن اراڭداتۋشىلىق ارەكەتتەردى بولدىرماۋى قاجەت. كەرى جاعدايدا وڭتۇستىك كورەيا بيلىگى راديوحابار تاراتۋىن دوعارمايدى.

 ال جەرگىلىكتى اقپارات كوزدەرىنىڭ حابارلاۋىنشا، ۆاشينگتون مەن سەۋل كورەي تۇبەگىنە بومبالاۋشى ۇشاقتاردى ورنالاستىرۋ ماسەلەسىن تالقىلاپ جاتقان كورىنەدى. الدىن الا مالىمەت بويىنشا، مۇندا اتومدىق سۇڭگۋىر قايىقتار دا جەتكىزىلۋى مۇمكىن.

 كيم مين سوك، وڭتۇستىك كورەيا قورعانىس مينيسترلىگىنىڭ وكىلى:

- ءبىزدىڭ اسكەر جاقسى دايىندالعان. ەگەر سولتۇستىك كورەيا وسىنداي ارانداتۋشىلىق ارەكەتتەرىن جالعاستىرا بەرەتىن بولسا، ءبىز قاراپ قالماي، جاۋاپ قايتاراتىن بولامىز.

www.24.kz