ديدار امانتاي: كوركەم- ادەبي كىتاپتان ءبىلىم ىزدەمەڭىز

بۇگىن نازارلارىڭىزعا ادەبيەتتانۋشى، جازۋشى ەلدوس توقتاربايدىڭ "سەرت" اڭگىمەسىنە جازۋشى ديدار امانتايدىڭ جازعان پىكىرىن ۇسىنامىز.
سەرتىنە بەرىك، سەنىمىنە كامىل، حالقىنا ادال، مۇراتىنا قياناتسىز. جازعانى فازىل ەسكەندىردىڭ شىعارمالارىنا ۇقسايدى ەكەن. ءبىراق، ناقىشى، بوياۋى ۇلتتىق نىشانعا تولى، بايانداعان ساتىندە اڭگىمەشى قازاقتىڭ مىڭ ءبىر ءتۇن بويى حيكايا شەرتكەن جاقسى داستۇرىنەن ءبىر كەز اينىمايدى، جولدان اۋىتقىمايدى، جەلىدەن شاتاسپايدى.
نەگىزىنەن، بايانداۋعا قۇرىلعان شاعىن- شاعىن سۋرەتتەر. تەمىر جول جەتكەن، پوشتا كولىگى اداسپاي تاپقان، عالامتور جەلىسىنە جالعانىپ، قاراماي جول تۇسكەن - قىر سۋرەتتەرى.
الايدا، سۋرەتتەر - سۋرەتكەرلىك شەبەرلىكتىڭ شىڭىنا كوتەرىلىپ كەلە جاتقان پەرزەنتتىڭ بيىكتەن قاراعانداعى العاشقى اسەرلەرى. ەندى بالاۋسا قالامنان تۋعان بالا كورىنىستەردى تۇلعالاندىرۋ كەرەك، ياعني سيپاتىنىڭ قايتالانبايتىندىعىن، تۇرپاتىنىڭ ايرىقشا ەكەندىگىن، ايتۋ ونەرىنىڭ تەرەڭدىگىن، ءسوزىنىڭ نىعىزدىعىن.. . سەندە عانا، مەندە عانا بار دەگەندىگىن.
وزىنە اسەر ەتكەندى اشىلا- اقتارىلا ايتقاندى توقتاتقان نە ازايتقان ءجون. ءاسىلى، وزگە جۇرتقا اسەر ەتەتىن ءتاسىلدى تابۋ قاجەت.
اۋەلى، زادى، جاعىمدى- جاعىمسىز كەيىپكەرلىكتى دوعارىپ، بەيتاراپتىقتى مەڭگەرگەن دۇرىس. بارلىق ادام جاعىمدى دا، جاعىمسىز دا... بىردە كول، بىردە ءشول.
كورىنىستى، كوڭىل- كۇيدى بەينەلەگەندە، كوپسوزدىلىكتەن قاشىڭىز، ايتپەسە، سۋرەت بۇلدىراپ كەتەدى، كوپ ءسوز تۇنىق ويدى لايلايدى. قۇدىقتان سۋ العاندا، تاستاعان شەلەگىڭىز جالعىز ءتۇسۋى كەرەك. بىرنەشەۋى قۇلاسا، تۇنىق سۋدىڭ تۇبىندەگى لاي قوزعالادى، ءمولدىر سۋ بىلعانىپ، لايى بەتىنە شىعادى.
ەشكىمدى تانىستىرماڭىز. قالىپتاسقان جاعدايىندا كورسەتىڭىز...
ءسوزىڭىز قۇنارلى، ءتىلىڭىز باي، ەندى كوركەم- ادەبي ماشىقتا ويدى، قيمىل- قوزعالىستى، كورىنىستى ءدوپ باساتىن ءسوزدى، سويلەمدى، قورىتىپ ايتقاندا، ءتاسىلدى ىزدەپ تابۋىڭىز قاجەت.
بولاشاعىڭىز بار. كىتاپتىڭ قادىرى، قالامگەردىڭ بەدەلى تايعان زاماندا ادەبيەتكە، ونەر ساحناسىنا كەلدىڭىز، جولىڭىز - اۋىر، تۇرمىسىڭىز - جاۋىر، ءبىراق، قالايدا سەرتىڭىزگە بەرىك بولىڭىز، ادەبيەت ونەردىڭ ءبىر ءتۇرى رەتىندە ەشقاشان جوعالمايدى، جويىلمايدى.
كوركەم- ادەبي كىتاپتان ءبىلىم ىزدەمەڭىز، وندا اۆتوموبيلدىڭ قۇرىلىمى، ءۇيدىڭ قۇرىلىسى جوق، ادەمىلىگى بار، اڭگىمەدەن پاراسات تابىڭىز، نوۆەللادان سۇلۋلىقتى كورىڭىز. بايقاڭىز، اڭعارىڭىز، بايىپتاڭىز...
شىعارمادا جازۋدىڭ كەمەل نۇسقاسى، ورنەكتىڭ قيىستىرىلعان اسقان مانەرى بار، مەنى سول ناقىش قىزىقتىرادى، شوقتىعى بيىك تۋىندىلارعا جەتكىزسىن قۇداي، تارتقان قالامنان تۋعان، ساعىنىشقا بوي الدىرعان جاقسى ءسوز - ادەمى ماشىقتا - ءبىز اڭساعان، مۇرات تۇتقان اسىل قۇندىلىققا، ۇلتتىق قازىنا- بايلىققا اينالادى.
ديدار امانتاي