الماتى اكىمى باۋىرجان بايبەك الماتى بازارلارىنداعى باعالاردى تەكسەرگەنىمەن باعا تۇراقتانا ما؟
قالا اكىمى «كوك بازارداعى» ساۋدا ورىندارىن قاراپ، ازىق- تۇلىك باعاسىن سۇرادى. ساۋداگەرلەر باعام وزگەرۋىنە قاتىستى تاۋارلارىن قىمباتتاتپاعانىن ايتتى. كەيبىرى ءتىپتى ساۋدالاسۋعا دا دايىن ەكەنىن ايتتى.
قالا اكىمى ساۋداگەرلەردىڭ بىرىنەن قىرىققاباتتىڭ قانشا تۇراتىنىن جانە جەڭىلدىك جاساۋىن سۇرادى. ساتۋشى بولسا ءوز كەزەگىندە باعانى ءتۇسىرىپ ساتۋعا قارسى ەمەس ەكەنىن ايتتى.
الايدا Tengrinews.kz تىلشىسىنە سۇحبات بەرگەن ساۋداگەرلەر كيىمنىڭ جانە ازىق- تۇلىكتىڭ كەيبىر ءتۇرىنىڭ 30 پايىزعا قىمباتتاعانىن مويىندادى.
«كوك بازاردىڭ» اتقارۋشى ديرەكتورى ەركىن قاليەۆ بازاردىڭ رەكونسترۋكتسياسىنا ارنالعان جوسپارىن تانىستىردى. ول 400 كولىككە ورىن بەرەتىن اۆتوتۇراقتىڭ جانە 1000 ورىندىق ساۋدا الاڭىنىڭ جوباسىن كورسەتتى. «كوك بازاردا» قايتا جوندەۋ جۇمىستارى بازار ەسەبىنەن جۇرگىزىلىپ جاتىر. ونىڭ ايتۋىنشا، جوبا قۇنى - 12 ميلليون تەڭگە. رەكونسترۋكتسيا كەلەسى جىلى اياقتالادى.
باۋىرجان بايبەك «كوك بازار» باسشىلىعىنا عيماراتتىڭ بەتكى بولىگىن قالپىنا كەلتىرۋدى، سونىمەن قاتار ۇرلىق پەن باسقا دا قىلمىستاردىڭ الدىن الۋ ماقساتىندا قوسىمشا ۆيدەوكامەرالار قويۋدى تاپسىردى.
سونىمەن قاتار، الماتى اكىمى كەڭسە زاتتارىنىڭ باعاسىمەن تانىسىپ شىقتى. ول 1 -قىركۇيەك قارساڭىندا مۇنىڭ ەڭ وزەكتى ماسەلەلەردىڭ ءبىرى ەكەنىن اتاپ ءوتتى.
ەسكە سالايىق، 2015 -جىلدىڭ 20 -تامىزىندا ق ر ۇكىمەتى ۇلتتىق بانكپەن بىرىگىپ، تەڭگەنىڭ ەركىن اۋىتقۋ باعامىنا ءوتۋ تۋرالى شەشىم شىعاردى. مۇندا ينفلياتسيالىق تارگەتتەۋ رەجيمىنىڭ نەگىزىندەگى جاڭا اقشا- كرەديت ساياساتىن جۇزەگە اسىرۋعا ءوتۋ، ۆاليۋتا ءدالىزىن الىپ تاستاپ، ەركىن اۋىتقۋ دالىزىنە ءوتۋ تۋرالى ءسوز بولىپ وتىر. مۇنداي شەشىم الەمدىك ەكونوميكاداعى جاعىمسىز فاكتورلاردىڭ كۇشەيۋىنىڭ نەگىزىندە قابىلدانعان.
وسىعان بايلانىستى پرەمەر- مينيستر ءوڭىر اكىمدەرىنە شتابتاردى قۇرىپ، حالىقتىڭ الەۋمەتتىك از قامتىلعان بولىگىن قولداۋعا شارالاردى جۇرگىزۋگە تاپسىرما بەردى. سونىمەن قاتار، الەۋمەتتىك ماڭىزى بار تاۋارلار مەن قىزمەتتەر قۇنىنىڭ نەگىزسىز قىمباتتاۋىنا قارسى شارالاردى قابىلداۋعا بۇيرىق بەرىلدى.
سول كۇنى مەملەكەت باسشىسى تەڭگە باعامىنىڭ وزگەرۋىنەن پايدا تابۋ ماقساتىندا تاۋار قۇنىن نەگىزسىز كوتەرەتىن كاسىپكەرلەردىڭ جاۋاپكەرشىلىگىن ايتىپ، ەسكەرتۋ جاسادى.
