قىتاي ءان دوداسىندا قازىلاردى تاڭقالدىرعان قازاق جىگىتىنىڭ جولى بولمادى
بەرىك ىسقاق وتكەن اپتادا عانا تالانتىمەن ءۇش تالىمگەردى وزىنە قاراتقان ەدى. ءبىراق سوڭعى كەزەڭدە جولى بولمادى. ونىڭ ايتۋىنشا، بۇل جولى جەتەكشىسى تابيعاتىنا ساي كەلمەيتىن ءاندى تاڭداپتى. سونىڭ كەسىرىنەن تومەن داۋىستا ورىنداپ، ءوزىنىڭ قابىلەتىن تولىق اشا الماعان. «دەگەنمەن بۇل جوبا مەنىڭ شىعارماشىلىعىما جاڭا سەرپىن بەردى» ، - دەيدى قىتايداعى قانداسىمىز. ەستەرىڭىزگە سالايىق، 35 جاستاعى قاراماي قالاسىنىڭ تۇرعىنى بەرىك ىسقاق بەيجىڭدە ءوتىپ جاتقان «قىتاي داۋىسى» جوباسىندا يسپان تىلىندەگى "Volare" ءانىن شىرقاپ، ءدۇيىم جۇرتتىڭ قوشەمەتىنە بولەنگەن ەدى. ال ەكى جىل بۇرىن وسى بايقاۋعا تاسقىن ەسىمدى قىتايداعى قازاق قاتىسىپ، «دۋدار- اي» انىمەن قازىلار القاسىن جىلاتقان ەدى. اتالعان جارىستا ونىڭ دا جۇلدىزى كوپ جانعان جوق ەدى.
ايتا كەتەيىك، بەرىك ىسقاق قىتاي حالىق رەسپۋبليكاسىنىڭ شىنجاڭ قاراماي ەلدى مەكەنىندە دۇنيەگە كەلگەن. 30 جاسىنا دەيىن ول ۇرىمجىدە تۇرىپ، الايدا كەيىن ءوز تۋعان جەرىنە قايتىپ كەلگەن. قازىرگى ۋاقىتتا ول جارىمەن بىرگە ىڭكار جانە گاۋھار ەسىمدى قىزدارىن تاربيەلەپ وتىر. سونىمەن قاتار، ونەرپاز قازاقستانعا كەلگىسى كەلەتىنىن، الايدا ناقتى مەرزىمىن اتاي المايتىنىن ايتىپ بەرگەن- دى.
