تۇركىستاندا دەنى ساۋ بويجەتكەن جىندىحاناعا جابىلعان

سەگىز جىلدان بەرى اقىل-ەسى اۋىتقىعان دەپ، دارىگەرلەر ونى تالاي تەزگە سالىپتى. قارشاداي عانا قىزدىڭ سودان بەرى كورمەگەن قۇقايى قالماعان. ءماجبۇرلى تۇردە ەم بەرىپ، ءتىپتى ونى بايلاپ تا تاستاعان كەزدەر بولعان ەكەن.
شىرعالاڭعا تۇسكەن قىزدىڭ تاعدىرى ءاۋ باستان-اق شىم- شىتىرىق. كەزىندە ول بالالار ۇيىندە تاربيەلەنگەن. كەيىن ونى ايەل ادام اسىراپ الادى. مىنە، سودان بەرى مارجان تاعدىرىم توزاققا اينالدى دەيدى. ايتۋىنشا، وگەي اناسى اسىراپ العان سوڭ قۇقاي كورسەتىپ، قورلاۋعا كوشكەن.
«ۇيدەن قۋىپ جىبەرەتىن. ءبىر كۇنى ول جۇمىستان كەلىپ ۇرىس باستالىپ كەتتى. كۇيەۋى: «وسى جەتىم شارشاتتى، ۇيدە ۇرىستان كوز اشپايتىن بولدى»، - دەپ، شىنجىرمەن ۇردى، مەن مەشىتكە قاشىپ كەتتىم. باسقا بارار جەرىم دە جوق ەدى. ورداباسى مەشىت الدىندا ءبىرشاما تۇردىم، ادامدار قايىرشى ەكەن دەپ اقشا تاستاپ كەتتى. قارنىم اشقان سوڭ جولدىڭ ارعى بەتىنە ءوتىپ نان الىپ جەدىم»، - دەپ ەسكە الادى مارجان تۇرلىبايەۆا وتكەن كۇندەرىن.
وقۋدا وزات بولماسا دا، ۇلگەرىمى وزگەگە ونەگە بولارلىقتاي بالا شاكىرتىنىڭ جىندىحاناعا جاتقىزىلعانىنا ۇستازى دا اڭ- تاڭ.
«قىز بالا ون جاستا بولاتىن، 5-سىنىپ وقۋشىسى. وعان مەكتەپكە كەلگەن ۇنايتىن، باسقا جامان قىلىقتارىن كورگەن ەمەسپىن، ءبىراق اناسى ەكەۋىنىڭ اراسى وتە ناشار بولاتىن. مارجان ساباققا كوبىنە دەنەسى كوگەرىپ كەلەتىن. ءبىز كورشىلەرىنەن سۇراپ كوردىك. ولار دا اناسىنىڭ ۇنەمى قىزدى توپەلەپ جاتاتىنىن ايتتى. ءبىز ونى انالىق قۇقىعىنان ايىرسىن دەپ ارىز جازدىق. ءبىراق، بەكەر بولدى، اناسى ونى جىندىحاناعا جاتقىزىپ تاستادى»، - دەيدى بۇرىنعى سىنىپ جەتەكشىسى شولپان مولدابايەۆا.
قازىر دارىگەرلەر قوعامعا قاۋىپتى دەپ تانىعان قىز تۇركىستان قالاسىنداعى پسيحونەۆرولوگيالىق مەديتسينالىق الەۋمەتتىك مەكەمەسىنە جابىلعان. كۇنى كەشە عانا كامەلەت جاسقا تولۋىنا بايلانىستى وسىندا كۇشتەپ قونىس اۋدارىپتى. ەندى ءومىر بويى بۇل مەكەمەنىڭ تابالدىرىعىنان اتتاپ شىعا المايدى. ءبىر قىزىعى، مۇنداعى ماماندار مارجاندى ءماجبۇرلى ەمگە قابىلداعانىمەن، ەشقانداي ءدارى- دارمەك بەرمەيدى ەكەن.
«وعان ەشقانداي ءدارى- دارمەك بەرىپ جاتقان جوقپىز، بىزگە كەلگەلى ۇيقىسى جاقسى، باسقا اۋىتقۋىن كورمەدىم»، - دەيدى تۇركىستان قالاسى پسيحونەۆرولوگيالىق الەۋمەتتىك مەكەمە دارىگەر پسيحياترى ابدۋللا يۋسۋپوۆ.
دارىگەرلەردىڭ بۇعان دەيىن دە ونىڭ ەمدەلۋىنە دەن قويعانى شامالى ەكەن. شىمكەنتتەگى بالالار پسيحونەۆرولوگيالىق مەديتسينالىق مەكەمەسىندە دە ەشقانداي ەم- دوم جاسالماپتى. كۇتۋشىلەر دە مارجاننىڭ جۇيكەسى سىر بەرگەن دەگەنگە كۇمانمەن قارايدى، دەپ جازادى otyrar.kz.