ج. ءابدىلدين: جاقسىلىق، ىزگىلىك پەن كىسىلىك قاسيەتتەرىن كىتاپتان تاپتىم

استانا. قازاقپارات - بۇگىن استانا قالاسىندا ءبىرىنشى رەت ءوتىپ جاتقان كىتاپ فەستيۆالىندە عالىم، فيلوسوفيا عىلىمىنىڭ دوكتورى، پروفەسسور، قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى، قازاقستانداعى ديالەكتيكالىق لوگيكا مەكتەبىنىڭ نەگىزىن سالۋشى جابايحان ءابدىلدين اعامىزدى كەزدەستىرىپ، از- كەم پىكىرلەستىك.

 اكادەميك الدىمەن كىتاپ وقۋدى جاقسى كورەتىن وقىرمانداردى اشىق اسپان استىندا ءوتىپ جاتقان كىتاپ مەرەكەسىمەن قۇتتىقتادى. «كەلەشەگىن ويلايتىن ادامزاتتىڭ اقىلشىسى - كىتاپ»، - دەيدى عالىم.

«بۇگىنگى فەستيۆالگە بايلانىستى، قازاق حالقىن، ونىڭ ىشىندە، كىتاپ وقدى جاقسى كورەتىن قاۋىمدى بار نيەتتىممەن كىتاپ مەرەكەسىمەن قۇتتىقتايمىن! مەنىڭ ويىمشا، كىتاپ - وتە قاسيەتتى دۇنيە. ءار ادام بويىنا سىڭگەن رۋحاني بايلىقتى، اسقاق ارماندى، كەلەشەككە دەگەن كوزقاراسىن كىتاپتان الادى. مەن ءوزىم كىتاپتى قاتتى سۇيەتىن اداممىن. مەنىڭ بويىمدا ءبىر جاقسىلىق، ىزگىلىك، پاتريوتتىق، كىسىلىك بولاتىن بولسا، وسىنىڭ بارلىعىن كىتاپتان الدىم. كىتاپ - عاجايىپ دۇنيە. كىتاپ ارقىلى كەرەمەت عۇلامالارمەن سويلەسەسىڭ، سۇحباتتاساسىڭ. كىتاپ ارقىلى سوكراتپەن، شەكسپيرمەن، گەتەمەن، پۋشكينمەن، ابايمەن، شوقانمەن تىلدەسىپ، سويلەسكەندەي بولاسىڭ. سوندىقتان دا، ءار ادام ءوز كەلەشەگىن ويلايتىن بولسا، ول كىتاپپەن دوس بولۋى كەرەك. دۇنيەنىڭ ءبارى وتپەلى بولعانمەن، ماڭگىلىك وي، رۋحاني دۇنيە كىتاپتا جاتىر»، - دەيدى ج. ءابدىلدين.

ال، اباي مەن شوقانداي قازاق ادەبيەتىندەگى كلاسسيكتەردىڭ مەرەيتويلارىنا توقتالعان عالىم ابايدىڭ ءار كىتابى قويىن داپتەردەي كەۋدە تۇسىمىزدا ءجۇرۋ كەرەك دەگەن ويىن ايتتى.

«بيىل - قازاق حاندىعىنىڭ 550 جىلدىعى، ابايدىڭ 170 جىلدىعى، شوقاننىڭ 180 جىلدىعى. بۇل مەرەكەلەردىڭ ءبىر جىلعا ءدال كەلۋى دە بەكەر ەمەس شىعار. بۇگىنگى كىتاپ تويىنا بايلانىستى ءاربىر جاس ابايدى وقىپ، ابايدى تۇسىنسە... مەن مىسالى، ابايدى ءومىر بويى وقىدىم. بويىڭدا اقىلىڭ قانشا بولسا، ابايدى سونشالىقتى جاڭا كوزقاراسپەن تۇسىنەسىڭ. اباي - كونە قۇبىلىس ەمەس، ءبىزدىڭ كەلەشەككە، بۇگىنگى ومىرىمىزگە وتە كەرەك قۇبىلىس. ابايدىڭ كىتاپتارىن قويىن داپتەر سياقتى قولىمىزدان تاستاماۋىمىز كەرەك»، - دەپ اقىل قوستى اكادەميك.

ونىڭ ۇستىنە، عالىم مىنا وركەنيەتتىڭ ەشبىر دۇنيەسى كىتاپتى الماستىرا المايتىنىن ايتىپ، كىتاپتى سۇيۋگە شاقىردى.

«تاعى دا ايتايىن دەگەنىم، كىتاپتى سۇيە ءبىلۋ كەرەك. تەلەديدار، عالامتور، بۇگىنگى كەرەمەت تەحنيكالىق جەتىستىكتەردىڭ ەشقايسىسى كىتاپتى الماستىرا المايدى. ارى كەتسە، ولار كىتاپتىڭ تەك قوسىمشاسى عانا...»، - دەپ ويىن قورىتتى فيلوسوف.

اۆتور: كەنجەكەي توقتامۇرات قىزى