ق ر مەملەكەتتىك حاتشىسى حالىقارالىق دزيۋدو فەدەراتسياسىنىڭ پرەزيدەنتىن قابىلدادى - فوتو

مەملەكەتتىك حاتشى بيىلعى 24-30 -تامىز ارالىعىندا ەلوردادا وتەتىن الەم چەمپيوناتىنىڭ يەسى رەتىندە قازاقستانعا تاڭداۋ جاساعانى ءۇشىن حالىقارالىق دزيۋدو فەدەراتسياسىنا العىسىن ءبىلدىردى.
«ەلىمىزدە سپورتقا ايرىقشا نازار اۋدارىلىپ وتىر. ەلباسىمىز جىل سايىن ۇلكەن اۋقىمداعى جاڭا سپورتتىق نىسانداردىڭ اشىلۋىنا ەرەكشە ءمان بەرۋدە. اتاپ ايتقاندا، ەلىمىزدە الەمدىك دەڭگەيدەگى سپورتتىق شارالار وتكىزىلۋدە جانە سپورتتىڭ بارلىق تۇرلەرى بويىنشا دايىندىقتار ءجۇرىپ جاتىر»، - دەدى گ. ءابدىقالىقوۆا.
مەملەكەتتىك حاتشى رەسپۋبليكادا 80 مىڭنان استام ادام دزيۋدومەن تۇراقتى تۇردە اينالىسىپ جۇرگەندىگىن، سپورتشىلاردىڭ شەبەرلىگىن جەتىلدىرۋ ءۇشىن بارلىق قاجەتتى جاعدايلار جاسالىپ وتىرعاندىعىن، وسى ورايدا بۇگىندە قازاقستاندا الەمدىك دودالاردا جەڭىمپاز بولعان سپورتشىلار قاتارى ءوسىپ كەلە جاتقاندىعىن اتاپ ءوتتى.
كەزدەسۋ بارىسىندا قازاقستاننىڭ حالىقارالىق دزيۋدو فەدەراتسياسىمەن ءوزارا ءىس- قيمىلىنىڭ جانە سپورتتىڭ وسى ءتۇرىنىڭ رەسپۋبليكامىزدا دامۋ كەلەشەگىنىڭ وزەكتى ماسەلەلەرى تالقىلاندى.
ايتا كەتەيىك، استانادا وتەتىن الەمدىك بىرىنشىلىكتە 140 ەلدەن 900 دەن استام سپورتشى قاتىسادى دەپ كۇتىلۋدە. ەرلەر مەن ايەلدەر اراسىندا 7 سالماق دارەجەسى بويىنشا 14 مەدال جيىنتىعى ساراپقا سالىنادى.
اۆتور: رۋسلان عابباسوۆ