تۇيمەدە دە تاۋداي تابىس بار

استانا. قازاقپارات - شىمكەنتتەن نە شىقپايدى دەسەڭىزشى! بۇگىندە بۇل قالادان نارىققا قاجەتتى بارلىق ءونىم شىعادى.
None
None

ءتىپتى انشەيىندە ەلەي بەرمەيتىن تۇيمە دە وسى جاقتا جاسالادى. «قازاقستاندا جاسالعان» دەگەن اتاۋى بار تۇيمەلەردى 2007 -جىلدان بەرى KazPlast كومپانياسى ءوندىرىپ كەلەدى.

KazPlast كومپانياسىنىڭ ديرەكتورى دانا جۇمابايەۆانىڭ ايتۋىنشا، العاشىندا كاسىپورىن تەك اسكەري فورمالارعا ارنالعان كيىمدەردىڭ تۇيمەسىن شىعارعان.

كەيىن جۇمىسشىلاردىڭ ارنايى كيىمدەرىنە ارنالعان تۇيمە تۇرلەرىن جاساۋعا كوشكەن. العاشقى 2007 -جىلى تۇيمە شىعارۋدى 1 ستانوك، 4 جۇمىسشىمەن باستاپتى. ال قازىر ءبىر اۋىسىمدا 20 ادام جۇمىس ىستەيدى. يتاليالىق قىمبات جابدىقتار ساتىپ الىنعان.

«بۇرىن بىزدەگى تۇيمە ءوندىرىسى قالىپتاسقان ەسكى ءادىس بويىنشا جۇرگىزىلەتىن. كەيىن تۇيمەلەردى ءارتۇرلى فورمادا جاساۋعا تالپىندىق. بىرنەشە ءتۇرىن، ءتۇسىن شىعارۋعا تىرىستىق. ول ءۇشىن، ارينە، تۇيمەلەرگە جەكە پرەسس-فورمالار قاجەت بولدى. ال پرەسس- فورمالارعا تاپسىرىس بەرۋ قوسىمشا قاراجاتتى قاجەت ەتتى. سول سەبەپتى، «بيزنەستىڭ جول كارتاسى - 2020» باعدارلاماسى بويىنشا «دامۋ» قورىنىڭ بانك زاەمىن الدىق» دەيدى دانا جۇمابايەۆا.

«دامۋ» قورى KazPlast كومپانياسىنا جوبا قۇنىنىڭ 44,3 پايىز مولشەرىندە كەپىل بەرىپ، 45,175 ميلليون تەڭگە كولەمىندە بانكتەن زاەم الۋىنا مۇمكىندىك جاساعان.

مەملەكەتتىڭ وسىنداي قامقورلىعىنىڭ ارقاسىندا، يننوۆاتسيالىق تەحنولوگيالاردى قولدانۋدىڭ مۇمكىندىگى تۋدى. ءوندىرىس كولەمىن كەڭەيتۋ، سۇرانىستى كوبەيتۋ ماقساتىندا كومپانيا يتاليالىق قىمبات جابدىقتار ساتىپ الدى. ءسويتىپ، تۇيمەلەردىڭ نەشە اتاسىن شىعارۋعا كىرىستى. اتاپ ايتقاندا، جەيدەلەرگە، كويلەكتەرگە، توندارعا جانە ارنايى كيىمدەرگە ارنالعان تۇيمەلەر جاساۋدا.

زاۋىتتىڭ تۇيمە دايىنداۋ تەحنولوگياسى اۆتوماتتى تۇردە ىسكە اسادى. الايدا بىرنەشە وندىرىستىك ساتىدان وتەدى. الدىمەن تۇيمەگە قاجەتتى قويمالجىڭ سۇيىقتىق كەپتىرىلەدى. سوسىن ونى ءارتۇرلى پىشىنگە سالادى. ارتىنشا تەسىكتەرى ويىلىپ، قاجەتتى قالىپقا كەلتىرىلەدى. سوڭىندا، تۇيمەنى بوياپ، تاپسىرىس بەرۋشىنىڭ قالاۋى بويىنشا ساۋدا بەلگىسىنىڭ تاڭباسىن نەمەسە جازۋ باسادى. تاپسىرىس بەرۋشىنىڭ تالابىنا قاراي مۇنداعى تۇيمەلەردىڭ پىشىندەرى دە ءارتۇرلى. ءتۇرى دە، ءتۇسى دە كوپ. ساپاسى جوعارى ءارى ءساندى. باعاسى دا قولجەتىمدى، شەتەلدىكىنەن 20 پايىزعا ارزان. تۇيمەنىڭ ءپىشىنى مەن ديامەترىنە بايلانىستى 1-5 تەڭگە ارالىعىندا ساتىلادى. كاسىپورىن وسى ۋاقىتقا دەيىن شامامەن 150 ميلليون تۇيمە شىعارىپ، تۇتىنۋشىلارعا جەتكىزگەن.

بۇگىندە كومپانيا تەك تۇيمە عانا ەمەس، تىگىن فۋرنيتۋراسىن، سونىڭ ىشىندە قاپسىرما، پلاستماسسا ىدىستاردىڭ نەگىزى، قاقپاقتار، كارابين، فيكساتور ءوندىرىپ، ساتۋمەن دە اينالىسادى. KazPlast كومپانياسى قازىر ءبىر اۋىسىمدا 50 مىڭ دانا تۇيمە شىعارادى. وسىلايشا، ەلىمىزدەگى بارلىق تىگىن فابريكاسىنىڭ سۇرانىسىن، ياعني ىشكى نارىقتى تۇگەل قامتىپ وتىر. ءتىپتى زاۋىت ونىمدەرى حالىقارالىق نارىقتا باسەكەلەستىككە يە بولا باستادى. ولاي دەيتىنىمىز - كومپانيانىڭ تۇيمەلەرى وزبەكستان، قىرعىزستان ەلدەرىنە ەكسپورتتالىپ جاتىر. رەسەي مەن بەلارۋس ەلدەرىنە دە تۇيمە تاراتۋ جوسپارلارى بار.

ايتا كەتەيىك، ۇكىمەتتىڭ كەڭەيتىلگەن وتىرىسىندا ەلباسى نۇرسۇلتان نازاربايەۆ يمپورتتى ازايتىپ، «قازاقستاندا جاسالعان» بەلگىسىمەن شىعاتىن تاۋارلاردى مولايتۋعا شاقىرعان بولاتىن. ەلباسى وتاندىق تاۋار تۇرلەرىن شىعارىپ قانا قويماي، ونى ساتىپ الۋ شارالارىن ۇيىمداستىرۋدى مىندەتتەگەن ەدى. سوندىقتان KazPlast كومپانياسىنىڭ بۇل ءوندىرىسى سول مىندەتتەمەدەن شىعارىلعان قورىتىندى دەۋگە بولادى.

«ايقىن»

سوڭعى جاڭالىقتار