ن. ابدىبەكوۆ: قاراعاندى وبلىسىنداعى سۋ تاسقىنىنان زارداپ شەككەندەرگە ۇيلەر تولىق سالىنىپ ءبىتتى - فوتو

«بۇگىن اباي اۋدانىندا سۋ تاسقىنىنان زارداپ شەككەندەرگە ءۇي سالۋ جۇمىستارىن اياقتادىق. تاسقىن سالدارىنان قيراعان ءۇيدىڭ ورنىنا 6 باسپانا سالىندى. ءوزىمىز جوسپارلاعانداي، 1 -قىركۇيەككە دەيىن قۇرىلىستى تاپسىردىق»، - دەدى جۋرناليستەرگە بەرگەن سۇحباتىندا ن. ابدىبەكوۆ.
ول باسقا اۋدانداردا جۇمىس قارقىندى جالعاسىپ جاتقانىنا توقتالدى.
«ءبىرىنشى كەزەكتە، الدىمىزعا بالالارى، ۇيلەرىندە مۇمكىندىگى شەكتەۋلى جاندارى بار وتباسىلارعا 1 -قىركۇيەككە دەيىن ءۇي سالىپ بەرەمىز دەگەن مىندەت قويدىق. ەكىنشى - 15 -قىركۇيەككە دەيىن بارلىق قۇرىلىستى اياقتاۋعا تىرىسامىز. ەگەر اياقتالماي قالىپ جاتسا، 1 -قازانعا دەيىن سوزۋىمىز مۇمكىن»، - دەدى ءوڭىر باسشىسى.
ونىڭ ايتۋىنشا، تامىز ايىنىڭ سوڭىنا دەيىن تاعى 200 گە جۋىق ءۇي پايدالانۋعا بەرىلەدى. وبلىستا بارلىعى 346 ءۇي سالۋ قاجەت. قازىر 50 دەن استام وتباسى جاڭا ۇيگە قونىستاندى. ءوڭىر باسشىسىنىڭ مالىمەتىنشە، ءۇي شارشى مەترىنىڭ قۇنى 90 مىڭ تەڭگەنى قۇراعان.
وبلىس اكىمى ۇيلەر قۇرىلىسىنا رەسپۋبليكالىق بيۋدجەتتەن ەكى ترانشپەن 3,1 ميلليارد تەڭگە بولىنگەنىن حابارلادى.
«بۇدان باسقا زارداپ شەككەندەرگە كومەك كورسەتۋ ءۇشىن قوعامدىق قور ارقىلى اقشالاي قاراجات جۇمىلدىرىلدى»، - دەپ قوستى ن. ابدىبەكوۆ.
ءۇي العاندار بيلىك وكىلدەرىنە العىس سەزىمدەرىن ءبىلدىردى.
اباي اۋدانىندا 7 ەلدى مەكەندى سۋ باسىپ، 96 وتباسى زارداپ شەكتى. ولارعا بيۋدجەتتەن ماتەريالدىق شىعىندارى ءۇشىن 17,4 ميلليون تەڭگە وتەماقى تولەندى. بۇدان باسقا، 15 ميلليون تەڭگەگە كيىم، توسەك- ورىن، ازىق- تۇلىك، تازالىق قۇرالدارى تۇرىندە جاردەم كورسەتىلدى.
قوعامدىق قور سەلدەن زارداپ شەگۋشىلەرگە سوماسى 8,5 ميلليون تەڭگەنىڭ كومەگىن كورسەتتى.