ەندى ديقاندار استىقتى دوللارمەن ساتۋدان پايدا كورە الادى - ءا. دارينوۆ
بۇل تۋرالى قازاقپارات تىلشىسىنە «قازاقستان فەرمەلەر وداعىنىڭ» پرەزيدەنتى اۋەسحان دارينوۆ ءمالىم ەتتى.
«بىرىنشىدەن، اۋىل شارۋاشىلىعىندا جۇمىس ىستەيتىن شارۋالارعا، كاسىپكەرلەرگە بۇل قۇبىلىس وڭ ىقپال ەتەدى. سەبەبى، ولاردىڭ كوبى نەسيەنى تەڭگەمەن العان. ەكىنشىدەن، ديقاندار استىقتى دوللارمەن ساتۋدان دا پايدا كورە الادى. الەمدەگى قازىرگى ەكونوميكالىق جاعداي ەشكىمگە دە وڭاي ءتۇسىپ جاتقان جوق. مەنىڭ ويىمشا، ەلىمىزدىڭ قازىرگى ەكونوميكالىق جاعدايىنان ۇتامىز نە ۇتىلامىز دەپ ەمەس، مەملەكەت باسشىسى ايتقانداي، بولاشاق ءۇشىن بىرگە ەڭبەكتەنۋ كەرەك. پرەزيدەنت بۇل داعدارىس تۋرالى بىلتىردان ايتىپ ءجۇر. مەن دە قول استىمداعى شارۋالارعا ەكى جىلدان بەرى الەمدىك ەكونوميكانىڭ وزگەرىستەرىنە دايىن بولۋ كەرەكتىگىن ايتىپ كەلەمىن»، - دەيدى ءا. دارينوۆ.
ونىڭ ايتۋىنشا، بۇل جاعدايدان شىعىنسىز شىعۋ ءۇشىن ديقانشىلار ءبىر كۇنىن، ءتىپتى ءبىر ساعاتىن دا جوعالتپاي ەڭبەكتەنۋى كەرەك.
«ەندى وتاندىق تاۋار وندىرۋشىلەر، اسىرەسە، ديقاندار ءبىر كۇندى، ءتىپتى ءبىر ساعاتتى دا جوعالتپاي استىق ورۋدى باستاۋى كەرەك. ءبىز ادەتتە اۋا رايىنىڭ قولايلى كەزەڭىن كۇتىپ وتىرامىز، ءبىراق ءقازىر ۋاقىت جوعالتۋعا بولمايدى. ءتىپتى، ەلباسى شەنەۋنىكتەردىڭ وزىنە جۇمىستا ناعىز سىنالاتىن كەز ەندى جەتكەنىن ايتتى. ياعني، ءبىزدىڭ، قاراپايىم شارۋالاردىڭ دا سىنالاتىن كەزى جەتتى»، - دەيدى وداق باسشىسى.
ءا. دارينوۆ اتاپ وتكەندەي، الداعى ەكى جىل ۋاقىتتا اۋىل شارۋاشىلىعىنا بۇرىنعىدان ەكى ەسە ارتىق نازار ءبولۋ كەرەك.
«الداعى ەكى جىلدا داعدارىسقا بايلانىستى اۋىل شارۋاشىلىعىنا بۇرىنعىدان ەكى ەسە ارتىق نازار ءبولۋ قاجەت. بۇل رەتتە تەك مەملەكەت تاراپىنان عانا ەمەس، شارۋالاردىڭ ءوزى دە جۇمىسىنا ەكى ەسە بەلسەندىلىكپەن كىرىسۋ كەرەك. قازاقستاننىڭ 40 پايىزى اۋىلدا ءومىر سۇرەدى. سوندىقتان، شارۋانىڭ ءونىمى ساپالى بولسا، سۇرانىس تا بولادى. مەن وڭاي بولادى دەپ وتىرعان جوقپىن، وسىنداي جاعداي قالىپتاسىپ وتىرعان سوڭ، ەندى كۇرەسۋ كەرەك»، - دەگەن ويىن تۇيىندەدى ءا. دارينوۆ.
اۆتور: كەنجەكەي توقتامۇرات قىزى
