جاپونيادا قاۋىپسىزدىك شارالارى كۇشەيتىلۋدە

استانا. قازاقپارات - جاپونيا قورعانىس مينيسترلىگى الداعى جىلى قارۋلى كۇشتەرگە بولىنەتىن قارجىنى كوبەيتۋدى سۇراپ جاتىر. اتالعان ۆەدومستۆو وعان قوسىمشا برون تاسىمالداعىش كولىكتەر مەن تىكۇشاقتار ساتىپ الماق.

 قازىر بۇل جوسپاردى ەل ۇكىمەتى قاراۋدا. ەگەر ماقۇلدايتىن بولسا، قورعانىس سالاسىنا جۇمسالاتىن اقشادان جاپوندىقتار جاڭا رەكورد جاسايدى ەكەن.

ال كورشى شەكارالاس ەلدەر بۇل باستاماعا الاڭداۋشىلىق ءبىلدىردى. كۇنشىعىس ەلىنىڭ قورعانىس مينيسترلىگى 2016 - جىلى ۆەدومستۆو قازىناسىنا 4 ميلليارد 900 ميلليون دوللار ءبولۋدى سۇراپ وتىر. اتالعان كورسەتكىش بيىلعى بيۋدجەتتەن 2 پايىزعا ارتىق. جوسپار بويىنشا، قىرۋار قارجى جاڭا اسكەري تەحنيكالاردى ساتىپ الۋعا جۇمسالماق.

سالا ماماندارىنىڭ ايتۋىنشا، مۇنىڭ ءبارى وڭتۇستىك قىتاي تەڭىزىندە ورنالاسقان ارالداردى قورعاۋ ءۇشىن قاجەت. فۋدزياما تۇبىندە جىل سايىن وتەتىن وقۋ- جاتتىعۋعا 2 مىڭنان استام جاۋىنگەر مەن 100 گە جۋىق اسكەري تەحنيكا قاتىسۋدا. سسەناري بويىنشا، ارالداردى بوگدە بىرەۋلەر جاۋلاپ الادى. ال جاپون اسكەرلەرى ونى ازات ەتۋى كەرەك.

حيروشي موريتا، قورعانىس كۇشتەرىنىڭ وكىلى:

- ءبىزدىڭ ويىمىزشا، قوعام باستامامىزدى قولدايدى. ويتكەنى ول قورعانىس سالاسىن كۇشەيتۋگە باعىتتالىپ وتىر. حيرويا يامادا، توكيو تۇرعىنى:

- اتىس- شابىس داۋىسىنان قۇلاق تۇنادى. وسىندا كەلىپ ءوز كوزىممەن كورگەنىمە قۋانىشتىمىن.

وقۋ- جاتتىعۋدى تاماشالاۋعا بيىل 12 مىڭعا جۋىق ادام كەلدى. ءبىراق بارلىعى بىردەي تاڭ- تاماشا   بولعان جوق. ءتىپتى كەيبىرەۋلەرى بالالارىنىڭ بولاشاعى ءۇشىن الاڭداۋلى ەكەن.

 شيحو ماتسۋموتو، توكيو تۇرعىنى:

 - مەنىڭ 3 بالام بار. سوندىقتان ولار ءۇشىن الاڭدايمىن. سوعىس ەشقانداي جاقسىلىق اكەلمەيدى عوي. ءبىراق قورعانىستى بەكىتپەي تاعى دا بولمايدى.

 قوعامدا ءارتۇرلى پىكىرتالاس بولعانىمەن، ەل پرەمەر- ءمينيسترى قورعانىس سالاسىنا كوبىرەك كوڭىل ءبولۋ كەرەك دەگەن قاعيداسىنان تانباي وتىر.

www.24.kz