استانادا بالاباقشا پەداگوگتارىن وقىتاتىن فاكۋلتەت اشىلادى
بۇل تۋرالى بۇگىن استانا ۇستازدارىنىڭ تامىز كەڭەسى كەزىندە قالالىق ءبىلىم بەرۋ باسقارماسىنىڭ باسشىسى ەلميرا سۋحانبەرديەۆا ءمالىم ەتتى.
«قالاداعى مەكتەپ الدى ءبىلىم بەرۋ جۇيەسىندە قالىپتاسىپ وتىرعان جاعدايدى ەسكەرسەك، مەكتەپكە دەيىنگى ءبىلىم بەرەتىن پەداگوگتاردىڭ الدىندا تۇرعان مىندەت - بالاباقشادان شىققان بالالاردىڭ مەكتەپكە دايىن كەلۋىن قامتۋ. ياعني، بالانىڭ مەكتەپتەگى ۇلگەرىمى بالاباقشادا العان ءبىلىمى مەن تاربيەسىنە تىكەلەي قاتىستى دەگەن ءسوز. سوندىقتان، بالاباقشا پەداگوگتارىنىڭ الدىندا تۇرعان مىندەت كوپ.
بۇرىن ل. ن. گۋميليەۆ اتىنداعى ەۇۋ- دە «الەۋمەتتىك عىلىمدار فاكۋلتەتى» وسى ماماندىققا وقىتتى دا، ەكى رەت تۇلەك شىعارعان سوڭ، سۇرانىستىڭ جوقتىعىنان ماماندىقتى جاۋىپ تاستادى. ءبىراق، قازىر ءبىلىمدى ءارى جاڭاشا ويلايتىن مامان تابۋ وتە قيىن»، - دەي كەلە ءبىلىم باسقارماسىنىڭ باسشىسى سۇرانىسقا بايلانىستى وسى ماماندىققا وقىتاتىن فاكۋلتەت اشىلاتىنىن جەتكىزدى.
«بيىل جاڭا وقۋ جىلىندا ەۋرازيا ۇلتتىق ۋنيۆەرسيتەتىنىڭ بازاسىندا «مەكتەپكە دەيىنگى پەداگوگيكا» فاكۋلتەتى اشىلىپ، بالاباقشالاردىڭ تاربيەشىلەرىن وقىتا باستايدى»، - دەپ اتاپ ءوتتى ە. سۋحانبەرديەۆا.
اۆتور: كەنجەكەي توقتامۇرات قىزى
