18:48, 19 - تامىز 2015 | GMT +5
مەملەكەت باسشىسى ۇلتتىق بانككە ۆاليۋتالىق ساياسات شارالارىن پىسىقتاۋدى تاپسىردى
استانا. قازاقپارات - بۇگىن مەملەكەت باسشىسى نۇرسۇلتان نازاربايەۆتىڭ توراعالىعىمەن اقوردادا ەكونوميكالىق ساياساتتىڭ جۇيەلى شارالارى تۋرالى كەڭەس ءوتتى، دەپ حابارلايدى پرەزيدەنتتىڭ باسپا ءسوز قىزمەتى.

كەڭەس بارىسىندا ۇلتتىق بانك ءتوراعاسى قايرات كەلىمبەتوۆ حالىقارالىق ۆاليۋتا قورىمەن بىرلەسە وتىرىپ ينفلياتسيالىق شەكتەۋگە كوشۋ ءىسى زەرتتەلەتىنىن اتاپ ءوتتى.
«بۇعان ءوتۋدىڭ ءوز مەرزىمدەرى بار، ءبىراق، قالىپتاسىپ وتىرعان جاعداي وزگەرمەسە، وندا ءبىز ينفلياتسيالىق شەكتەۋدى ەنگىزۋ ءىسىن تەزدەتەمىز جانە ۇكىمەتپەن كەلىسكەننەن كەيىن ءتيىستى ۇسىنىسىمىزدى ايتامىز» ، - دەدى ق. كەلىمبەتوۆ.
مەملەكەت باسشىسى ۇكىمەتكە وتە قىسقا ۋاقىتتا ورتا مەرزىمدى پەرسپەكتيۆانى ەكونوميكالىق وسىممەن قامتاماسىز ەتۋ جونىندەگى شارالاردىڭ جوسپارىن ازىرلەۋدى تاپسىردى. سونىمەن قاتار، ۇكىمەت پەن ۇلتتىق بانككە قازىرگى جاعدايلارعا بايلانىستى شۇعىل تۇردە ەكونوميكالىق جانە ۆاليۋتالىق ساياسات شارالارىن پىسىقتاۋدى تاپسىردى.
اۆتور: كەنجەكەي توقتامۇرات قىزى