ەلىمىزدە اۋقاتتىلار تاريحي ەسكەرتكىشتەردىڭ جانىندا تۋىستارىن جەرلەۋدى سانگە اينالدىردى

اسىرەسە، 550 جىلدىق تاريحى بار قازاق حاندىعىنىڭ قالىپتاسۋىنا وزىندىك ۇلەسىن قوسقان بيلەر مەن قولباسشىلاردىڭ جانىندا مۇنداي زيراتتار كوبەيىپ كەتكەن.
تەلەارنا تىلشىلەرىنىڭ مالىمەتىنشە، ەلىمىزدە ونداعان تاريحي جادىگەردىڭ ءحالى مۇشكىل. «بىرەۋى كۇردەلى جوندەۋدى تالاپ ەتسە، قالعاندارى ەليتالىق مازارلارعا اينالعان. بۇلاي دەيتىنىمىز قالتالى ازاماتتار سوڭعى ۋاقىتتا و دۇنيەگە اتتانعان اتا- باباسىن حاندار مەن بيلەردىڭ جانىنا جەرلەۋدى قۇپ كورەدى»، - دەپ حابارلادى تىلشىلەر.
مەملەكەت تاريحى ينستيتۋتىنىڭ ديرەكتورى بۇركىتباي اياعاننىڭ ايتۋىنشا، جەزقازعان قالاسىنان سولتۇستىك- شىعىسقا قاراي 50 شاقىرىم جەردەگى جوشى حان ەسكەرتكىشىنىڭ جانىندا 10 مەتر جەردە ءبىر ازامات ءوزىنىڭ اكە- شەشەسىنە ارنايى كەسەنە قويعان. «مۇنى ءبىز اۋدان اكىمىمەن كەزدەسكەن كەزدە كوڭىل اۋدارىپ ايتتىق. بۇل قالاي، مادەني ەسكەرتكىشتىڭ جانىندا دەدىك. بىزگە كەزىندە بولىپ كەتكەن ەكەن، ەندى بولمايدى دەگەن جاۋاپتى ەستىدىك»، - دەدى بۇركىتباي اياعان.
بۇل باسسىزدىقتى انىقتاعان وتاندىق تاريحشىلاردىڭ ەندى ءار ءوڭىردىڭ اتقامىنەرلەرىمەن كۇرەسىپ جاتقانى حابارلانىپ وتىر. سونىمەن قاتار، سارى ارقا توسىندەگى اڭىزبەن استاسقان ۇلىتاۋ ولكەسى مەن تاريحى مول تاراز، ساۋران، جەتىسۋداعى جادىگەرلەرىمىزدىڭ تۇگەندەلىپ جاتقانى حابارلاندى.
تاريحشىلار ءبىر اپتانىڭ ىشىندە ءتورت جارىم مىڭ شاقىرىم جەردى ارالاپ، قابىرعاسى ۇگىتىلىپ، قۇلاۋعا شاق قالعان مۇرالارىمىزدىڭ كۋاسى بولىپتى. الداعى ۋاقىتتا ەلىمىزدىڭ مادەني ەسكەرتكىشتەرىنىڭ قاتارىنا ەنگەن كەسەنەلەردىڭ جانىنداعى قاراپايىم ازاماتتاردىڭ مازارلارىن كوشىرۋ ماسەلەسى شەشىلەدى.