شەتەلدە وقىعان قازاقستاندىق جاستار جەكە كاسىپكەرلىكتى باستاۋ ءۇشىن ۇلكەن تاۋەكەلگە بارادى - ق. بيشىمبايەۆ

2012 -جىلدان بەرى داستۇرگە اينالعان سلەتكە بيىل 250 دەن استام ستۋدەنت قاتىسۋدا.
سلەتتىڭ پلەنارلىق وتىرىسىندا «بولاشاق» قاۋىمداستىعى كەڭەسىنىڭ ءتوراعاسى، «بايتەرەك» حولدينگىنىڭ باسقارما ءتوراعاسى قۋاندىق بيشىمبايەۆ شەت ەلدە وقىعان قازاقستاندىق ستۋدەنتتەردىڭ ەلگە ورالعاننان كەيىنگى ماقسات- مىندەتى تۋرالى ءوز ويىن ايتتى.
«مەملەكەت باسشىسى ن. نازاربايەۆ ۇنەمى «الدىمەن ەكونوميكا، سودان سوڭ ساياسات» دەگەن قاعيدانى ۇستانادى. سوندىقتان «بولاشاق» قاۋىمداستىعى دا، «بايتەرەك» حولدينگى دە شەت ەلدە وقىپ كەلگەن جاس مامانداردىڭ، سونىڭ ىشىندە «بولاشاق» تۇلەكتەرىنىڭ كاسىپكەرلىكپەن اينالىسۋىنا جاعداي جاساۋ ءۇشىن ستراتەگيا ازىرلەدى. ستراتەگيادا نەگە كاسىپكەرلىكتىڭ دامۋىنا ءبىرىنشى ورىندى بەرىپ وتىرمىز، سونى ءتۇسىندىرىپ وتسەم. جالپى، «بولاشاق» باعدارلاماسى بولسىن، ءوز قاراجاتىمەن بولسىن، شەت ەلدە وقىپ كەلگەن بالالاردىڭ بارلىعى بىردەن ۇلتتىق كومپانيالاردا، مەملەكەتتىك ورگانداردا قىزمەت اتقارعىسى كەلەدى دەگەن ۇعىم ابدەن قالىپتاسىپ قالعان. ءبىراق بۇل ولاي ەمەس.
«بولاشاقتىڭ» تۇلەكتەرى بولسىن، شەت ەلدە وقىعان باسقا جاستار بولسىن، جەكە كاسىپپەن اينالىسىپ، بيزنەستە جۇمىس ىستەگىلەرى كەلەدى. بۇل وتە ماڭىزدى فاكتور. سەبەبى، ءدال وسى جەكە كاسىپكەرلىك ارقىلى ولار ەكونوميكانىڭ دامۋىنا ۇلەس قوسىپ، جاڭا جۇمىس ورىندارىن اشادى»، - دەيدى ق. بيشىمبايەۆ.
ونىڭ ويىنشا، ەلگە ورالىپ، جەكە كاسىپ اشۋدى ويلاعان جاستار ۇلكەن تاۋەكەلگە بەل بۋادى.
«ءبىر سوزبەن ايتساق، جاس مامان ۇلكەن تاۋەكەلگە بەل بايلايدى. بۇل تاۋەكەل تالانت پەن ءبىلىمدى قاجەت ەتەدى. سوندىقتان «بولاشاق» قاۋىمداستىعى، «بايتەرەك» حولدينگى، جاس كاسىپكەرلەر ۇيىمى بۇل باعىتتى ماڭىزدى دەپ تاپتىق. بۇل باعىتتا ءبىز ءبىر جارىم اي بۇرىن «بولاشاق- ستارتاپ» جوباسىن ىسكە قوستىق. بۇل باعدارلامىنىڭ ءمانىسى مىنادا: جوبا اياسىندا كاسىپتى جاڭا قولعا العان بىرنەشە جاستى تاڭداپ الىپ، ولارعا جول سىلتەيمىز. ەكىنشى ءبىر ماڭىزدى باعىت شەت ەلدە وقىعان جاستاردىڭ تاجىريبەسىن قازاقستانداعى ستۋدەنتتەرگە ۇيرەتۋ كەرەك. سول ءۇشىن ءقازىر ءبىز بيزنەس تۋرالى جيناقتى باسپاعا دايىنداپ جاتىرمىز»، - دەپ حابارلادى ول.
اۆتور: كەنجەكەي توقتامۇرات قىزى