قاتون- قاراعايدا «التاي - التىن بەسىك» حالىقارالىق ەكسپەديسياسى باستالدى
دەپ حابارلادى حالىقارالىق تۇركى اكادەمياسىنىڭ باسپا ءسوز قىزمەتىنەن.
ءۇش كۇنگە جوسپارلانعان بۇل القالى جيىنعا ازەربايجان، قىرعىزستان، تۇركيا جانە قازاقستاننىڭ بەلگىلى تۇركىتانۋشى عالىمدارى، ارحەولوگيالىق ينستيتۋتتاردىڭ باسشىلارى مەن ءبىر توپ شەتەلدىك جانە جەرگىلىكتى ب ا ق وكىلدەرى قاتىسۋدا. ايتا كەتۋ كەرەك، تۇركى دۇنيەسى ارحەولوگتارىنىڭ باسىن قوسقان ايتۋلى شاراعا تۇركيالىق «TIKA» ۇيىمى قولداۋ كورسەتىپ وتىر.
حالىقارالىق ەكسپەديتسيا بارىسىندا بيىلعى زەرتتەۋ ناتيجەلەرى قورىتىندىلانىپ، تۇركى دۇنيەسىنىڭ ارحەولوگياسىنا قاتىستى ماڭىزدى ماسەلەلەر تالقىلانادى. سونىمەن قاتار، شەتەلدىك عىلىمي ۇيىمدارمەن ىنتىماقتاستىق تۋرالى قۇجاتتارعا قول قويىلادى دەپ كۇتىلۋدە. اشىق اسپان استىندا كورمە ۇيىمداستىرىلىپ، قاتىسۋشىلار نازارىنا بيىلعى ارحەولوگيالىق قازبا جۇمىستارىنان تابىلعان ولجالار ۇسىنىلماق.
بىلتىر اكادەميا العاشقى ارحەولوگيالىق قازبا جۇمىستارىن وسى التاي تاۋلارىنان باستاعان ەدى. ويتكەنى، التاي تاۋلارى - تۇگەل تۇركىنىڭ التىن بەسىگىنە بالانادى. بۇل تۋرالى كونە تۇركىنىڭ «ەرگەنەكون» جىرىندا ايتىلادى. بەلگىلى تاريحشى- ارحەولوگ زەينوللا ساماشيەۆتىڭ باسشىلىعىمەن جۇرگىزىلگەن بىلتىرعى قازبا جۇمىستارى كەزىندە VI- VIII عاسىرلار شاماسىندا جەرلەنگەن جاۋىنگەر جىراۋدىڭ جاتقان جەرى تابىلعان بولاتىن. ساربازبەن بىرگە جەرلەنگەن قوبىز قايتا قالپىنا كەلتىرىلىپ، اكادەميا جانىنداعى تۇركى مۋزەيىنىڭ قۇندى جادىگەرلەر قاتارىن تولىقتىردى.
