الماتىداعى ناۋرىزباي اۋدانىندا توتەنشە جاعداي رەجىمى الىنىپ تاستالدى - فوتو

بۇل تۋرالى بۇگىن الماتى قالاسى اكىمىنىڭ باسپا ءسوز قىزمەتىنەن حابارلادى.
«الماتى اكىمى باۋىرجان بايبەك بۇگىن ناۋرىزباي اۋدانىن ارالاپ، جەرگىلىكتى تۇرعىندارمەن كەزدەستى. سونداي- اق قالا باسشىسى قاراعايلى وزەنىنىڭ سۋ ارناسىن قالپىنا كەلتىرۋ جۇمىستارىمەن تانىستى جانە سۋ توعانىنىڭ سۇزگىلەۋ ستانساسىن، سەلدەن قورعاۋ بوگەتىن، سۋ تازارتۋ ستانساسىن ارالاپ، ءبىلىم نىساندارىنىڭ الداعى وقۋ جىلىنا دايىندىعىن تەكسەردى»، - دەلىنگەن حابارلامادا.
ودان باسقا، باۋىرجان بايبەك وسى جۇمىس ساپارى بارىسىندا قالالىق ورگان باسشىلارىمەن كوشپەلى كەڭەس وتكىزدى. وندا مەملەكەتتىك ورگانداردىڭ جەتەكشىلەرى اتقارىلىپ جاتقان جۇمىستار مەن الداعى جوسپارلار جونىندە بايانداما جاسادى. جيىن بارىسىندا تۇرعىنداردى سۋمەن قامتاماسىز ەتۋگە ارنالعان تەحنيكالىق جابدىقتاردى قالپىنا كەلتىرۋ جۇمىستارىنىڭ وڭ ناتيجە بەرىپ جاتقاندىعى جانە تازارتۋدىڭ تولىق كەزەڭىنەن كەيىن اۋىز سۋ ساپاسىنىڭ ءبىرشاما جاقسارعاندىعى ايتىلدى.
قازىرگى تاڭدا جالپى ۇزىندىعى 13 شاقىرىم بولاتىن قاراعايلى وزەنىنىڭ زاقىمدالعان 7 شاقىرىمىنىڭ 5 شاقىرىمنان استام جەرى تازارتىلىپ، جاعالاۋدى نىعايتۋ جۇمىستارى جۇرگىزىلدى.
406 ۋچاستوك تازارتىلىپ، 175855 تەكشە مەتر تۇرمىستىق قالدىقتار، لاي جانە تاس ۇيىندىلەرى شىعارىلدى.
ۇلتتىق گۆارديانىڭ ءنومىرى №28237- اسكەري ءبولىمى جاۋىنگەرلەرى مەن تەحنيكاسىنىڭ كومەگىمەن ءنومىرى №187- ورتا مەكتەپتىڭ جەرتولەلىك بولمەلەرى تازارتىلدى. قازىرگى ساتتە مەكتەپ 98 پايىزعا تازارتىلعان.
قالا باسشىسى توتەنشە جاعدايدى بولدىرماۋ ماقساتىندا ءبىرقاتار الدىن الۋ شارالارىن جۇرگىزۋدى تاپسىردى. وزەن جاعالاۋىن نىعايتۋ كەرەكتىگىن باسا ايتتى. سونىمەن قاتار، سەل تاسقىنىنان زارداپ شەككەن تۇرعىنداردىڭ تالاپ- تىلەكتەرىن تىڭدادى. تۇرعىندار ەلباسىنىڭ كورسەتىپ جاتقان قامقورلىعىنا جانە سەل سالدارىن جويۋ بارىسىندا بارلىق مەملەكەتتىك قۇرىلىمداردىڭ ۇيلەسىمدى ارەكەت جاساعاندارىنا العىستارىن ايتىپ، زارداپ شەككەن اۋدانداردا كۇندەلىكتى تۇرمىس- تىرشىلىك بۇرىنعى قالپىنا بىرتىندەپ كەلىپ جاتقاندىعىن جەتكىزدى.
«توتەنشە جاعداي رەجىمىن الىپ تاستاۋ تۋرالى شەشىم قابىلداندى. ەندى، بۇدان كەيىنگى تازارتۋ، اباتتاندىرۋ جۇمىستارىن كوممۋنالدىق قىزمەتتەر شتاتتىق رەجىمدە جۇرگىزەتىن بولادى. قازىر ءبىرىنشى كەزەكتەگى مىدەتتەردىڭ ءبىرى - بارلىق ءۇش مەكتەپتى الداعى وقۋ جىلىنا جاقسىلاپ دايىنداۋ. بارلىق تەحنيكالىق جانە سانيتارلىق نورمالار ساقتالاتىن بولسىن. بالالار زارداپ شەكپەۋى كەرەك. ەڭ باستىسى، وزەن ارناسىن بەكىتىپ، نىعايتۋ قاجەت»، - دەدى ب. بايبەك.