تۇركى تىلدەس ەلدەردىڭ ورتاق تەلەارناسىنىڭ تۇجىرىمداماسى ماقۇلداندى - فوتو

بۇل تۋرالى بۇگىن تۇركىتىلدەس مەملەكەتتەر ىنتىماقتاستىعى كەڭەسىنىڭ اقپارات جانە مەديا سالاسىنداعى مينيسترلەرىنىڭ ءبىرىنشى كەزدەسۋى قورىتىندىسىنا ارنالعان بريفينگتە ق ر ينۆەستيتسيالار جانە دامۋ ءمينيسترى اسەت يسەكەشيەۆ ايتتى.
«تۇركىتىلدەس ەلدەردىڭ ورتاق تەلەارناسىن اشۋ باستاماسىن ەلباسىمىز نۇرسۇلتان ءابىش ۇلى نازاربايەۆ بىلتىر تۇركيادا كوتەرگەن بولاتىن. سودان بەرى تاراپتار ءبىرتالاي جۇمىس اتقاردى. بۇگىنگى كەزدەسۋدە ورتاق تەلەارنانىڭ جۇمىسى بويىنشا ناقتى ۇسىنىستاردى قاراستىردىق. ارنانىڭ تۇجىرىمداماسى ماقۇلداندى. قورىتىندى حاتتاماعا، سونداي- اق ۇلتتىق تەلەارنالار اراسىنداعى ىنتىماقتاستىق تۋرالى حاتتاماعا جانە اقپاراتتىق اگەنتتىكتەر اراسىنداعى ءوزارا تۇسىنىستىك تۋرالى مەموراندۋمعا قول قويىلدى»، - دەپ اتاپ ءوتتى مينيستر.
سونىمەن قاتار ءا. يسەكەشيەۆ تۇركىتىلدەس ەلدەردىڭ ورتاق تەلەارناسىن اشۋ ءبىزدىڭ مەملەكەتتەرىمىزدىڭ اراسىنداعى قارىم- قاتىناستى ودان ءارى دامىتۋ جولىندا جاسالعان زور قادام دەپ ەسەپتەيتىندىگىن باسا ايتتى.
ايتا كەتەيىك، كەزدەسۋگە قازاقستان، ازەربايجان، قىرعىزستان جانە تۇركيانىڭ ب ا ق سالاسىنداعى وكىلەتتى ورگاندارىنىڭ باسشىلارى مەن وكىلدەرى قاتىستى.
اۆتور: مارلان جيەمباي