شورتاندى كولىنىڭ جاعاسىندا سپورتتا ۇلكەن جەتىستىكتەرگە جەتكەن بالالارعا قۇرمەت كورسەتىلدى - فوتو

اقمولا وبلىسىنىڭ بۋراباي اۋدانىندا، شورتاندى كولىنىڭ جاعاسىندا ورنالاسقان بالالار لاگەرىندە جىلدىڭ ءتورت ماۋسىمىندا دا مەكتەپ وقۋشىلارىنا دەمالۋىنا جانە ءماندى دە مازمۇندى وقۋ- ساۋىقتىرۋ ءىس- شارالارىنا قاتىسۋىنا بارلىق جاعداي جاسالعان.
بۇل جەردە تەك قانا بىلىمدە جانە ءار ءتۇرلى جارىستاردا ۇزدىك شىققان بالالار دەمالاتىنىن اتاپ ءوتۋىمىز كەرەك. قازىر لاگەردە 11 دەن 16 جاسقا دەيىنگى 570 بالا تىنىعۋدا.
وسى جولى «و، سپورت، سەن - الەمسىڭ!» دەگەن اتاۋمەن وتكەن 11 - اۋىسىمنىڭ سالتاناتتى اشىلۋى سپورت كۇنىنە سايكەس كەلدى. ءىس- شارا بالالاردى سپورتپەن اينالىسىپ، سالاۋاتتى ءومىر سالتىن ۇستانۋعا شاقىردى. سپورت سالاسىن، سونىمەن قاتار بۇقارالىق سپورتتى دامىتۋعا مەملەكەت باسشىسى ەرەكشە نازار اۋدارىپ وتىرعانى اتاپ ءوتىلدى. بۇگىنگى تاڭدا ەل تۇرعىندارىنىڭ 22 پايىزى سالاۋاتتى ءومىر سالتىن سەرىك ەتەتىنى، ال 2020 -جىلعا دەيىن بۇقارالىق سپورتتى جانى قالايتىنداردىڭ قاتارى 30 پايىزعا جەتەتىنى ايتىلدى.
سالتاناتتى شارادا ايرىقشا وقيعا بولعانىن اتاپ وتكەنىمىز ءجون. ەلىمىزدىڭ ءار وڭىرىنەن كەلگەن، جاسىنان سپورتتى سەرىك ەتىپ، ۇلكەن ناتيجەلەرگە جەتىپ، ەلىمىزدىڭ ابىرويىن اسقاقتاتىپ جۇرگەن سپورتشى بالالارعا قۇرمەت كورسەتىلدى. ەسىمدەرى مەن وسى كۇنگە دەيىن الىپ ۇلگەرگەن اتاق- دارەجەلەرى اتالىپ، ورتاعا شاقىرىلدى.
اتاپ ايتقاندا، وڭتۇستىك قازاقستاندىق ايبەك سالمان - شاحماتتان قازاقستان چەمپيونى؛ سولتۇستىك قازاقستاندىق لارينا دۋگينا - سۋعا جۇزۋدەن قازاقستان چەمپيونى؛ قوستانايلىق ارۋنا سارسەنباي - دويبىدان قازاقستاننىڭ ون ءبىر دۇركىن چەمپيونى؛ وڭتۇستىك قازاقستاندىق بەكزات بايدوللا - كاراتە دودان قازاقستاننىڭ جيىرما ءبىر دۇركىن چەمپيونى، ەكى دۇركىن الەم چەمپيونى؛ وڭتۇستىك قازاقستاندىق ءسات امانوۆ - كاراتە دودان قازاقستاننىڭ ون بەس دۇركىن چەمپيونى، ازيا چەمپيونى، ەكى دۇركىن الەم چەمپيونى؛ الماتى قالاسىنان جاسمين مۋتاليپوۆا - دزيۋدودان الەم چەمپيونى؛ تاراز قالاسىنان انگەلينا بلوگودارنايا - كاراتە دودان قازاقستان چەمپيونى؛ تاراز قالاسىنان نۇرعاليا ءمالىم - تايەكۆاندو ITF قازاقستاننىڭ ءتورت دۇركىن چەمپيونى؛ جامبىل وبلىسىنان مارتا ۋزبايەۆا - كاراتە دودان قازاقستان جانە الەم چەمپيونى.
«بالالار ارالىنا» دەمالۋعا كەلگەن وقۋشىلاردى ق ر ءبىلىم جانە عىلىم مينيسترلىگىنىڭ اكىمشىلىك دەپارتامەنتىنىڭ ديرەكتورى انار قايىربەكوۆا قۇتتىقتاپ، ءسوز سويلەدى. سونىمەن قاتار «بالداۋرەن» وقۋ- ساۋىقتىرۋ ورتالىعى باس ديرەكتورىنىڭ ورىنباسارى بىرلىك بارجاقسىموۆ ءبىلىم مەن سپورتتا بيىك بەلەستەردى باعىندىرعان بالالاردى قۋانا قارسى الاتىنىن جەتكىزدى.
ءانۇران شىرقالىپ، تۋ كوتەرىلدى.
وسى كۇنى «جاستار» پەداگوگيكالىق وتريادىنىڭ ۇيىمداستىرۋىمەن كونسەرت قويىلدى. وندا بالالارعا ارنالعان قىزىقتى كورىنىستەر جانە قازاق حاندىعىنىڭ 550 جىلدىعىنا وراي ءان- كۇيلەر ورىندالدى.
14 كۇنگە سوزىلاتىن وسى اۋىسىم باراسىندا ءبىرقاتار سپورت تۇرلەرى بويىنشا جارىستار وتەتىنى جوسپارلانىپ وتىر.