قازاقستاننىڭ ەڭبەك سىڭىرگەن ونەر قايراتكەرى، كومپوزيتور بازارباي جۇمانيازوۆ دۇنيەدەن ءوتتى

م. اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ باسپا ءسوز قىزمەتىنىڭ حابارلاۋىنشا، مارقۇمدى اقتىق ساپارعا شىعارىپ سالۋ ءراسىمى 19 -تامىزدا وتەدى. ازىرگە وتەتىن ورنى بەلگىلەنگەن جوق.
جۇمانيازوۆ بازارباي ساعادي ۇلى 1936 -جىلى 1 -قازاندا باتىس قازاقستان وبلىسى بوكەي ورداسى اۋدانىنىڭ وردا اۋىلىندا دۇنيەگە كەلگەن. وردا اتىنداعى ورتا مەكتەپتىڭ 7 -سىنىبىن بىتىرگەن سوڭ، 1951-1955 -جىلدارى ورال پەداگوگيكالىق ۋچيليشەسىندە، 1956-1958 -جىلدارى اباي اتىنداعى اكادەميالىق وپەرا جانە بالەت تەاترىنىڭ جانىنداعى حور ستۋدياسىندا ءبىلىم العان.
1965 -جىلى الماتى كونسەرۆاتورياسىن (قازىرگى قازاق ۇلتتىق كونسەرۆاتورياسى) پروفەسسور ە. گ. برۋسيلوۆسكي كلاسى بويىنشا بىتىرگەن. 1964-1965 -جىلدارى «قازاقفيلم» كينوستۋدياسىندا مۋزىكالىق رەداكتور، 1965-1966 -جىلدارى «مەكتەپ» باسپاسىندا مۋزىكا رەداكتسياسىنىڭ مەڭگەرۋشىسى بولعان. 1966 -جىلدان الماتى كونسەرۆاتورياسىندا پەداگوگيكالىق قىزمەتپەن شۇعىلداندى. 1973-1984 -جىلدارى قازاقستان كومپوزيتورلار وداعىنىڭ ەكىنشى حاتشىسى، ك س ر و كومپوزيتورلار وداعى باسقارماسىنىڭ مۇشەسى، 1984-1987 -جىلدارى قازاق اكادەميالىق وپەرا جانە بالەت تەاترىنىڭ ديرەكتورى، 1991-1998 -جىلدارى كومپوزيتورلار وداعىنىڭ ءبىرىنشى حاتشىسى قىزمەتتەرىن اتقارعان. 1998 -جىلدان دەربەس زەينەتكەر بولدى.
بازارباي جۇمانيازوۆتىڭ تۇڭعىش مۋزىكالىق شىعارماسى - «جەر» (و. سۇلەيمەنوۆ سوزىنە) وراتورياسى. سونداي-اق ونىڭ «ماحامبەت» وپەراسى (1990 -جىل)، «وتان تۋرالى كانتاتا» (1972 -جىل)، «ەڭبەك داڭقى» (1974 -جىل)، «وتان سالتاناتى» (1974 -جىل)، «مەرەكەلىك شەرۋ» (1980 -جىل)، «دوستىق» (1980 -جىل)، «كەڭ بايتاق وتانىم مەنىڭ» (1988 -جىل) كانتاتالارى؛ «حالقىم تۋرالى ءان» (1969 -جىل)، «كەك ءانى» (1978 -جىل)، «1731» اتتى ۆوكالدى- سيمفونيالىق پوەمالارى؛ «دالا» (1976 -جىل) سيمفونيالىق كارتيناسى؛ «قۋانىش» (1980 -جىل) سيمفونيالىق كۇيى؛ سيمفونيالىق وركەسترگە ارنالعان ەكى سيۋيتاسى (1985, 1987 -جىل)؛ «ايتىس» (1972 -جىل) اتتى ۆوكالدى- حورەوگرافيالىق كومپوزيتسياسى، «اقىرزامان جاستارى» (اباي سوزىنە، 1995 -جىل)، «جامبىل تويى - ەل تويى» (ك. سالىقوۆ سوزىنە، 1996 -جىل)، «جامبىل - قۇلمامبەت» (ت. مولداعاليەۆ، 1996 -جىل) كانتاتالارى جانە كوپتەگەن اندەرى مەن رومانستارى بار. سونداي-اق سازگەر 10 سپەكتاكل مەن 18 كينوفيلمگە مۋزىكا جازدى.
ول 1970 -جىلى ولجاس سۇلەيمەنوۆتىڭ «ادامعا تابىن جەر، ەندى!» اتتى پوەماسىنا ارناپ جازعان 5 ءبولىمدى كانتاتاسى ءۇشىن بۇكىلوداقتىق جاستار وداعى سىيلىعىنىڭ لاۋرەاتى اتاندى. 1986 -جىلى «حالىقتار دوستىعى» جانە 1999 -جىلى «پاراسات» وردەنىمەن ماراپاتتالعان.
بازارباي ساعادي ۇلى شىعارماشىلىعى قازاق وپەراسىنا تىڭنان جول تارتقان، ۇلكەن ىزدەنىس ارقىلى ومىرگە كەلگەن ۇلتتىق بوياۋى قانىق تۋىندىلاردان تۇرادى.
اۆتور: جاپپاربەرگەن ايبوتا