لوندوندىقتار ءۇشىن ءۇي جالداعاننان گورى جۇمىسقا ۇشاقپەن قاتىناعان الدەقايدا ءتيىمدى

استانا. قازاقپارات -    ۇلى بريتانيا استاناسىندا جىلجىمايتىن مۇلىكتىڭ باعاسى كۇن ساناپ اسپانداپ بارادى. سالدارىنان جەرگىلىكتى حالىقتىڭ ءوزى تۇرعىلىقتى قالاسىن تاستاپ، شەتكەرى جاققا كوشۋگە ءماجبۇر.

قازىر لوندون ورتالىعىنداعى باسپانانىڭ 60 پايىزى جالعا بەرىلەدى ەكەن.

ساراپشىلار بولسا، تۇرعىن ءۇي سالاسىندا داعدارىس باستالدى دەپ جار سالىپ جاتىر. جەر بەتىندە ەمەس، جەرتولەدە ورنالاسقان 15 مەترلىك ستۋديانىڭ قۇنى ايىنا 1600 فۋنتقا باعالانعان، بۇل شامامەن جارتى ميلليون تەڭگەنى قۇرايدى. ريەلتوردىڭ ايتۋىنشا، بۇل -  ءسال قىمباتتاۋ. سەبەبى جاعدايى ءماز ەمەس، جوندەۋى ساپاسىز، تەلەفون مەن ينتەرنەت ءالى قوسىلماعان. سويتە تۇرا ريەلتورلار وسى اياداي بولمەنىڭ ساناۋلى كۇندە ءوتىپ كەتەرىنە سەنىمدى. قىزۋ ەڭبەك ماۋسىمى باستالادى، ورنالاسقان اۋدانى قولايلى ءارى مەترو دا جاقىن.

 اشحەن وۆاكيميان، ريەلتور:

 - جالعا بەرۋ باعالارى ءبىرشاما تۇراقتانعان سياقتى. ساتىلاتىن پاتەرلەر قۇنى ءوسىپ جاتىر. بۇل ءۇردىس سايلاۋدان كەيىن، كونسەرۆاتورلاردىڭ بيلىكتە تاعى 5 جىلعا قالاتىنى بەلگىلى بولعاننان كەيىن باستالدى.

 ءبىر قىزىعى پاتەر قۇنى اسپانداپ تۇرسا دا، لوندون تۇرعىندارىنىڭ مۇرتىن بالتا شاپپايدى. ويتكەنى ساتىلاتىن تۇرعىن ءۇي باعالارى ولار ءۇشىن ماڭىزدى ەمەس. زەرتتەۋ ناتيجەلەرىنە سەنسەك، قالالىقتاردىڭ 95 پايىزى ەل استاناسىنان پاتەر الۋعا قاۋقارسىز. ال قالعان 5 پايىزى ول اراب ەلدەرى، گونكونگ، باتىس ەۋروپادان قۇيىلعان ينۆەستيتسيا ەكەن. لوندون ورتالىعىندا بوس ورىننىڭ ءوزى اقىلعا سىيمايتىن باعاعا ساۋدالانۋدا. جاقىندا 3 جىلدان كەيىن ساتىلاتىن پاتەرلەر 5 ساعاتتىڭ ىشىندە ساتىلىپ كەتتى. وعان قول جەتكىزۋ ءۇشىن قالتالى لوندوندىقتار ءبىر كۇن بۇرىن كەزەككە تۇرعان ەكەن. پاتەرلەردىڭ قۇنى ورتاشا ەسەپپەن جارتى ملن فۋنت، ياعني 800 مىڭ دوللارعا باعالاندى.

 ريچارد لارمان، زەينەتكەر:

 - مەن ءوز قالامدى جاقسى كورەمىن. ءبىراق لوندوندا ءومىر ءسۇرۋ مۇمكىن بولماي كەتتى.

 جەرگىلىكتى حالىقتىڭ ءوزى قالا شەتىنە نە مۇلدە باسقا جاقتارعا كوشىپ كەتتى. ريەلتورلاردىڭ ايتۋىنشا، ورتالىقتاعى ۇيلەردىڭ 60 پايىزى جالعا بەرىلەدى. حالىق قازىر پاتەر ەمەس، ءۇيدىڭ ىشىنەن بۇرىش جالداۋعا كوشتى. تۋعان توپىراعىنان ورىن تاپپاي بەزگەن بريتانيالىقتار مۇنىڭ بارىنە بيلىكتى كىنالايدى. ويتكەنى ولار شەتەلدىكتەرگە سالىناتىن سالىقتى كوتەرگەن سايىن، قالتالى ينۆەستورلار ەش شىمىرىكپەستەن باسپانا باعاسىن دا شارىقتاتا بەرەتىن كورىنەدى.

 ەندى لوندوندىقتار ءۇشىن ءۇي جالداعاننان گورى، مادريدتە تۇرىپ، جۇمىسقا ۇشاقپەن قاتىناعان الدەقايدا ءتيىمدى ەكەن. ال جەرگىلىكتى جۇرتتى ىعىستىرىپ، ەۋروپادان اعىلىپ جاتقان شەتەلدىكتەر سانى كۇن ساناپ ءوسىپ جاتىر.

www.24.kz