11:41, 17 - تامىز 2015 | GMT +5
التايدا ءۇسىپ قالعان الپينيستەردىڭ ءمايىتىن تىكۇشاقپەن تاسىمالدايدى
استانا. قازاقپارات - جەكسەنبى كۇنى 14 - تامىزعا قاراعان ءتۇنى التاي رەسپۋبليكاسى اكترۋ مۇزدىعىندا قازا تاپقان 4 ءالپينيستىڭ ءمايىتى تىكۇشاقپەن تاسىمالدانادى دەپ كۇتىلۋدە.

«وقىس وقيعا بولعان جەردە تىكۇشاقتىڭ قونۋىنا ارنالعان ورىن دايىندالىپ جاتىر. اۋا رايى قولايلى بولسا، مايىتتەر بۇگىن تاسىمالدانادى»، - دەپ «ينتەرفاكس» رەسەيدىڭ تەرگەۋ كوميتەتىنىڭ ايماق بويىنشا تەرگەۋ باسقارماسىنا سىلتەمە جاساپ حابارلادى. ۆەدومستۆو وكىلى الپينيستەردىڭ قازا تابۋى فاكتىسى بويىنشا تەرگەۋ الدى تەكسەرۋ جۇمىستارى جۇرگىزىلىپ جاتقانىن ايتتى.
ەسكە سالا كەتەيىك، تامىزدىڭ 14-نە قاراعان ءتۇنى التاي رەسپۋبليكاسىنداعى كۋپول شىڭىنا شىعۋ كەزىندە تومسكتىڭ ءتورت ءالپينيستى - ولەگ تۆەردوحلەبوۆ، دميتريي شەلەفونتيۋك، اندرەي مارتىنوۆ جانە اليسا روتانوۆا مەرت بولدى. الدىن الا بولجام بويىنشا، ولاردىڭ ولىمىنە كۇننىڭ كۇرت سۋىتۋى سەبەپ بولعان.