يۋان قۇنسىزدانۋىنىڭ قازاقستان ەكونوميكاسىنا اسەرى قانداي؟

استانا. قازاقپارات - وسى اپتادا قىتاي ۇلتتىق ۆاليۋتاسىنىڭ سوڭعى 20 جىل ىشىندەگى ەڭ ۇلكەن دەۆالۆاتسياسىن جاسادى.
None
None

ازاتتىق كەيبىر ەكونوميستەردەن يۋاننىڭ قۇنسىزدانۋىنىڭ قازاقستان ەكونوميكاسىنا اسەرىن سۇرادى.

تامىزدىڭ 11 ى كۇنى قىتايدىڭ حالىق بانكى يۋاننىڭ ا ق ش دوللارىنا شاققانداعى باعامىن 1,9 پايىزعا ارزانداتتى. كەلەسى كۇنى رەسەيدە دوللار مەن ەۋرو قىمباتتادى. بيرجالىق ساراپشىلار رەسەي ۆاليۋتاسىنىڭ قۇلدىراۋىن مۇناي باعاسىنىڭ ارزانداۋى جانە قىتاي حالىق بانكىنىڭ يۋاندى دەۆالۆاتسيالاۋ شەشىمىمەن بايلانىستىرادى.

ازاتتىق كەيبىر قازاقستاندىق ساراپشىلارعا «قىتاي يۋانى السىرەۋى قازاقستان ەكونوميكاسى مەن تەڭگە باعامىنا قالاي اسەر ەتەدى؟» دەگەن سۇراق قويدى.

وراز جاندوسوۆ، «راكۋرس» ەكونوميكالىق تالداۋ ورتالىعى ديرەكتورى:

يۋاننىڭ السىرەۋى قازاقستان ەكونوميكاسىنا دا، تەڭگە كۋرسىنا دا ەشقانداي اسەر ەتپەيدى. قاي پوزيتسيا جاعىنان الساق تا، ءبىز قىتايعا باسەكەلەس بولا المايمىز.

پەتر سۆويك، ەكونوميست:

الەمدە مۇناي باعاسى ارزانداي باستايدى. قازاقستان ەكونوميكاسى بۇدان دا كوپ توقىرايدى. قازاقستان شىعىنىن كوبەيتۋگە ءماجبۇر بولادى، ال قازاقستاننىڭ تولەم بالانسى ءتىپتى ناشارلاي تۇسەدى. مەنىڭشە، يۋاننىڭ السىرەۋى - قىتايدىڭ ەكونوميكالىق ەمەس، ساياسي شەشىمى.

مەرۋەرت ماحمۋتوۆا، قوعامدىق پروبلەمالاردى تالداۋ ورتالىعى ديرەكتورى:

دەۆالۆاتسيا - قىتايدىڭ ەكسپورت پوزيتسيالارىن جاقسارتۋعا تىرىسقان امالى. بۇل - ەكونوميكا ءوسىمىنىڭ باياۋلاۋىمەن كۇرەسۋ ادىستەرىنىڭ ءبىرى. بۇلار - الەمنىڭ ەڭ ءىرى ەكونوميكالارى اراسىنداعى تارتىس.

ال ءبىز ءۇشىن قىتاي - مينەرالدى رەسۋرستارىمىزدى تۇتىنۋشى رەتىندە ماڭىزدى. قىتاي ەكونوميكاسى ءوسىمىنىڭ باياۋلاۋى ءبىزدىڭ شيكىزاتقا دەگەن سۇرانىستىڭ ازايۋىنا ۇلاسادى. رەسەي ءرۋبلىنىڭ قۇلدىراۋى، مۇناي باعاسىنىڭ ارزانداۋى، قىتاي ەكونوميكاسى ءوسىمىنىڭ باياۋلاۋى جانە يۋان باعامىنىڭ ءتۇسۋى تەڭگە كۋرسىنا اسەر ەتەدى.

مۇنىڭ ءبارىن ەسكەرسەك، قازاقستاندى قيىن زامان كۇتىپ تۇر، ەكونوميكا ءوسىمى باياۋلاپ، ەكسپورت پەن يمپورت كولەمى ازايادى، سوندىقتان جاعداي ءماز ەمەس. دەۆالۆاتسيا سالقىنى بىلتىر كۇزدە رەسەي ءرۋبلى قۇلدىراعان كەزدە سەزىلگەن. ءقازىر ەلدىڭ التىن- ۆاليۋتا قورىن وڭدى- سولدى اياماي جۇمساپ جاتىرمىز. بۇلاي جالعاسا بەرۋى مۇمكىن ەمەس.

ءسابيت حاكىمجانوۆ، HalykFinance زەرتتەۋ دەپارتامەنتى ديرەكتورى:

قازىر ونسىز دا رۋبلگە شاققانداعى تەڭگە باعامى شامامەن 25 پايىزعا اسىرا باعالانىپ وتىر. دەۆالۆاتسيا بولۋى مۇمكىن، ءبىراق بىزدە تەڭگە باعامىن بىرتىندەپ ءتۇسىرۋ ستسەنارييى بار. قاتاڭ باقىلاۋدا ۇستاۋ ارقىلى تاياۋ ەكى- ءۇش جىل ىشىندە تەڭگە جىلىنا شامامەن التى پايىزعا ارزاندايدى. بۇل - ءبىز ءۇشىن نەگىزگى سەناري. بىزدە دەۆالۆاتسيا جۇرگىزۋ قاراستىرىلعان جاناما سەناريدە بار. مەنىڭشە، يۋاننىڭ قۇنسىزدانۋى - بۇكىل پروبلەمانىڭ باسى عانا، ويتكەنى قىتايدىڭ جاعدايى ءماز ەمەس. قىتايمەن باسەكەلەسۋگە قاۋقارسىز ەكەنىمىز باياعىدان بەلگىلى. ءبىز ءۇشىن ەكى پايىزدىڭ ءمانى جوق، ال ولار ءۇشىن ەكى پايىز وتە ۇلكەن ءرول وينايدى. رۋبلگە شاققانداعى پروبلەمالارىمىز 25 پايىز، سوندىقتان ءبىزدى ەكى پايىز قۇتقارا المايدى.

دەرەككوز: ازاتتىق

سوڭعى جاڭالىقتار