ا ق ش-تاعى وزبەك ازاماتى سوتتا ي م-گە قولداۋ كورسەتكەنىن مويىندادى

استانا. قازاقپارات - ا ق ش- تا نيۋ- يورك تۇرعىنى بولىپ تابىلاتىن وزبەك ازاماتى يراك جانە سيرياداعى «يسلام مەملەكەتى» ەكسترەميستىك توبىنا ماتەريالدىق كومەك كورسەتپەك بولعانىن مويىندادى.

پروكۋراتۋرا وكىلدەرىنىڭ ايتۋىنشا، 25 جاستاعى ءابدىراسۋل حاسان ۇلى دجۋرابويەۆ 15 جىلعا باس بوستاندىعىنان ايىرۋ جازاسىنا كەسىلۋى مۇمكىن.

2014 -جىلدىڭ تامىز ايىندا ول عالامتوردا ەگەر «يسلام مەملەكەتىنەن» ءتيىستى بۇيرىق السا، ا ق ش پرەزيدەنتى باراك وباماعا قاستىق ارەكەت جاساۋعا نەمەسە كوني ايلەند ارالىنداعى شيپاجايلىق ايماعىندا جارىلىس جاساۋعا دايىن ەكەنى تۋرالى حابارلاما جاريالاعان.

دجۋرابويەۆ اعىمداعى جىلدىڭ اقپان ايىندا برۋكليندەگى ۇيىندە ۇستالدى. سول ۋاقىتقا دەيىن ول تۇركياعا ناۋرىز ايىندا ۇشۋ بيلەتىن ساتىپ العان - تەرگەۋدىڭ شامالاۋىنشا، دجۋرابويەۆ ودان سيرياعا جەتىپ، جيحادشىلاردىڭ قاتارىنا كىرگىسى كەلدى، دەپ حابارلايدى BBC.

دجۋرابويەۆپەن بىرگە لاڭكەستىككە قاتىسى بار دەپ كۇدىككە الىنىپ وتىرعان تاعى ءتورت ادام قاماۋعا الىندى. قالعان ۇستالعاندار سوتتا ءوز كىناسىن مويىنداعان جوق.