جاپونيا قىتاي مەن كورەيادان كەشىرىم سۇرامايدى
ايتسە دە سيندزو ابە سوعىس جىلدارى جاپون مەملەكەتىنىڭ جازىقسىز جانداردى جاپا شەكتىرگەنىن مويىندادى. ءبىراق قىتاي مەن كورەيا كۇتكەن كەشىرىم ءسوزىن جەڭىستىڭ 70 جىلدىعىنا وراي ۇيىمداستىرىلعان شارادا ايتقان جوق.
15 - تامىز - جاپون حالقى ءۇشىن كۇرسىنىسپەن قارسى الاتىن كۇن. وسىدان 70 جىل بۇرىن ەكىنشى دۇنيەجۇزىلىك سوعىستا جاپونيا جەڭىلگەنىن رەسمي تۇردە مويىنداعان ەدى. سوعىس جىلدارى قىلعان قياناتتارى ءۇشىن قىتاي مەن كورەيا كەشىرىم سۇراۋلارىن بىرنەشە مارتە تالاپ ەتتى. ءبىراق ول وتىنىشتەر جاۋاپسىز قالعان. بۇل جولى دا سيندزو ابە كوپشىلىك كۇتكەن ءسوزدى تىلىنە تيەك ەتپەدى.
سيندزو ابە، جاپونيانىڭ پرەمەر- ءمينيسترى:
- جاپونيا سوعىس جىلدارى كەشىرىم سۇراپ، وكىنىشىن بىلدىرگەن. قارالى كۇندەر حالىق ەسىندە. سوعىستان كەيىنگى جاپونيانىڭ ارەكەتى تەك ەلدى گۇلدەندىرۋگە باعىتتالدى. ءبىز كەلەشەكتە دە وسى باعىتتى ۇستانامىز.
پرەمەر- ءمينيستردىڭ اۋزىنان شىققان بۇل سوزدەر جىل باسىنان بەرى ءار ارىپىنە دەيىن ءجىتى تەكسەرىلىپ، دايىندالعان بولاتىن. ويتكەنى پەكين مەن سەۋل مالىمدەمەدەگى ءار سويلەمنىڭ تالداناتىنىن ەسكەرتكەن. ءبىراق قازىرگى جاپون بيلىگى وسىدان 20 جىل بۇرىن كەشىرىم سۇراعان بيلىكتەگى اتالارىنىڭ ءسوزىن قايتالامادى. ونىڭ ورنىنا كەلەشەك ۇرپاقتىڭ تاعدىرىن ويلاۋعا شاقىردى.
سيندزو ابە، جاپونيانىڭ پرەمەر- ءمينيسترى:
- ءبىز ەندى سوعىستى بولدىرماۋعا ارەكەت ەتەمىز. حالىقارالىق شيەلەنىستەردىڭ بولۋىنا جول بەرمەيمىز. سوندىقتان بالالارىمىز بەن نەمەرەلەرىمىزدىڭ ءومىر بويى كەشىرىم سۇراۋىن توقتاتۋ كەرەك. ولاردىڭ سوعىسقا قاتىسى بولماعان.
جاپونيا جۇرتشىلىعى سوعىس تاقىرىبىن ءجيى قوزعايتىن بولعان. ويتكەنى 70 جىلدان كەيىن جاپونيا ءوزىن- ءوزى قورعاۋعا قۇقىق بەرەتىن زاڭدى تالقىلاۋدا. زاڭ جوباسى تومەنگى پالاتادا ماقۇلدانىپ، جوعارى پالاتادان جاۋاپ كۇتۋدە. بۇل تالقى قازىردىڭ وزىندە ەلدىڭ تۇكپىر- تۇكپىرىندەگى شەرۋلەرگە سەبەپ بولدى. كوپشىلىكتىڭ ءبىر- اق تىلەگى بار. ول زۇلمات سوعىستىڭ ەندى قايتالانباۋى بولىپ تابىلادى.
www.24.kz
