سولتۇستىك قازاقستاندا قالايى ءوندىرۋ زاۋىتى سالىنادى

پەتروپاۆل. قازاقپارات - 2018-جىلى س ق و ايىرتاۋ اۋدانىندا مەتالدىق قالايى ءوندىرۋ بويىنشا «سىرىمبەت» تاۋ-كەن بايىتۋ كەشەنى ىسكە قوسىلادى.

جوبا يندۋستريالاندىرۋ كارتاسىنا ەنگىزۋگە ۇسىنىلعان.

مۇندا 6 مىڭ تونناعا دەيىن قالايى ءونىمىن ءوندىرۋ كوزدەلگەن. جوبا قۇنى 10 ميلليارد تەڭگە، 500 دەن استام جۇمىس ورنى قۇرىلادى.

بۇل تۋرالى وبلىس اكىمى ەرىك سۇلتانوۆتىڭ قاتىسۋىمەن وتكەن وڭىرلىك ۇيلەستىرۋ كەڭەسىندە ايتىلدى.

«ءوندىرىستى دامىتۋ جوسپارىنا سايكەس شتات 500 ادامنان اسادى. «سىرىمبەت» كومپانياسىنا جۇمىسقا الۋدا ماڭايداعى اۋدان تۇرعىندارىنا باسىمدىق بەرىلەدى. قازىر كاسىپورىندا 36 ادام جۇمىس ىستەيدى. تاۋ-مەتاللۋرگيالىق كەشەندى 2018-جىلى ىسكە قوسۋ كوزدەلگەن»، - دەدى س ق و يننوۆاتسيالىق دامۋ باسقارماسى باسشىسىنىڭ ورىنباسارى قۋانىش ءجۇسىپوۆا.

«بۇل ايماقتاعى ءىرى جوبالاردىڭ ءبىرى. قۇنى 10 ميلليارد تەڭگە. 2018-جىلى ونى ىسكە قوسۋىمىز كەرەك»، - دەدى ايماق باسشىسى.