ۇلى بار انالارعا ون ءبىر كەڭەس

نۇر-سۇلتان. قازاقپارات - سەزىنگەن نارسەسىن سوزبەن ايتىپ جەتكىزۋگە بەيىمدەڭىز.

بالا قاجىعان كەزدە ايعايلاۋى، ۇيالعان ساتتە تىعىلۋى، قورىققاندا جىلاپ، تولقىعاندا تىستەنۋى مۇمكىن.

ونىڭ ءوزىن قالاي ۇستاۋ كەرەكتىگىن ءتاننىڭ ماجبۇرلەۋى ەكەنىن ءتۇسىندىرىڭىز. ءدال سونداي سەزىم كەزىندە وزگە ادامداردىڭ ءوزىن قالاي ۇستاعانىن كورسەتىڭىز. بالاڭىزبەن ءوز كوڭىل- كۇيىڭىزدى اڭگىمەلەڭىز.

ەرتەڭ ەسەيگەن كەزدە اشۋ مەن ۇيالۋدىڭ، كوڭىل قالۋ مەن قايعىنىڭ اراجىگىن ايىراتىن بولادى. ءوزىنىڭ سەزىمدەرىن باقىلاپ ۇيرەنەدى. ولاردى دۇرىس سەزدىرۋگە داعدىلانادى.

بالاڭىزدىڭ ەڭ سەنىمدى جانكۇيەرى بولىڭىز. مۇنى تۇسىنبەس بۇرىن تالاي مارتە ونىڭ مەكتەپتەگى جەتىستىكتەرىن ايتىپ، الەۋمەتتىك جەلىنى شۋلاتارسىز، تۋعان كۇنىندە جاقسى كورەتىن ءانىن سالىپ بەرەرسىز، قىزداردىڭ كوزىنشە بالا كۇنگى سۋرەتتەرىن كورسەتەسىز. ءبىر كۇنى ۇلىڭىز كەلىپ: «جەتەر، اناشىم، توقتا» دەيدى. ول ۇيالار. ءبىراق جەر بەتىندە سىزدەن ارتىق جانكۇيەرى، قامقورشىسى جوق ەكەنىن تۇسىنەدى.

وعان كىتاپ وقىپ بەرۋدى، ونىمەن بىرگە وقۋدى ادەت ەتىڭىز. بالا اتا- اناسىنىڭ تىزەسىندە وتىرىپ كىتاپ وقىعاندى ۇيرەنەدى. بالاڭىز ءسىزدىڭ كىتاپ وقىعانىڭىزدى كورىپ وسكەنى ابزال. نە وقىعانىڭىزدى ايتىپ بەرىڭىز وعان.

ءوزىڭىزدىڭ جاقسى كورەتىن جازۋشىڭىزدى، ۇناتاتىن شىعارمالارىڭىزدى ورتاعا سالىڭىز. كىتاپ وقۋدىڭ ماڭىزىن ەرتە جاستان ساناسىنا قۇيۋعا تىرىسىڭىز. بىرگە وقىڭىزدار. سوسىن بىرگە تالقىلاپ، قيالعا بىرگە بەرىلىڭىزدەر. بالاڭىزدىڭ جاقسى كورەتىن ەرتەگى كەيىپكەرىنىڭ سۋرەتىن سالۋعا كومەكتەسىڭىز. بەلسەندى وقىرمان بولۋعا ۇيرەتىڭىز.

ۇلگى الۋعا تۇرارلىق جاقسى ادامداردىڭ بارىنا كوزىن جەتكىزىڭىز. اقىلدى، باتىل، مىقتى، دارىندى، ادال ادامدار تۋرالى كوپ ايتىڭىز. ونداي ادامدارمەن تانىستىرىپ ءجۇرىڭىز. اتاقتى جازۋشى، ساياحاتشى، زەرتتەۋشى، عالىم، سۋرەتشى، عارىشكەر، ارتىستەر تۋرالى كوپ اڭگىمەلەڭىز. ولار قالاي ءومىر ءسۇردى، جەتىستىككە جەتۋ ءۇشىن قانداي قيىندىق كوردى، سونىڭ ءبارىن قالاي جەڭگەنىن تاپتىشتەڭىز. سىرتقى الپەتتەن گورى، جان سۇلۋلىعى ماڭىزدى ەكەنىن ەسكەرتىپ وتىرىڭىز.

ءبارىبىر بۇزاتىن زاتتاردى الاڭسىز بۇلدىرۋىنە مۇمكىندىك بەرىڭىز. ەگەر بالاڭىز كيىمىن كىر قىلىپ كەلگەن سايىن، وعان ۇرىسساڭىز، بەكەر ۋاقىت جوعالتاسىز. ءارى بالانىڭ رۋحىن سىندىرىپ الاسىز. ادام ءوز قۋاتىن اشۋعا جەڭدىرمەگەنى دۇرىس. بالا اعاشقا ورمەلەپ، لاي سۋدى كەشىپ ءجۇرىپ ءومىر تانيدى. بۇل قالىپتى ۇدەرىس. كونىڭىز. قابىلداڭىز.

ونىڭ قىزىعۋشىلىعىن تۋدىراتىن دۇنيەگە ءمان بەرىڭىز. ول ۇناتاتىن فۋتبولدى بۇگە- شىگەسىنە دەيىن ءبىلىپ الىڭىز. قاي كوماندانى جاقسى كورەتىنى، قاي ويىنشىنى ەرەكشە ءپىر تۇتاتىنىن انىق ءبىلىڭىز. ونىڭ سۇيىكتى ءانىن، ول سالاتىن پاندالاردىڭ سۋرەتىن سالۋدى ۇيرەنىڭىز. ونىڭ ومىرىنە بەلسەندى اتسالىسقانىڭىز ءجون. سىرتىنان كوز قىرىن سالاتىن باقىلاۋشى بولماڭىز.

ويناۋعا مۇرسات بەرىڭىز. ءسىز قانشا قالاساڭىز دا، بالاڭىز ۇنەمى جەڭە بەرمەسى انىق. ءسىز وعان ۇنەمى: «كوپ جاتتىعۋ جاساعان سوڭ، سەن جەڭىمپاز بولدىڭ» دەرسىز. ءبىراق ول تۇسىنبەۋى مۇمكىن. تۇسىنبەگەنى دە دۇرىس. ويتكەنى، ۇنەمى جەڭە بەرۋ مۇمكىن ەمەس. دەگەنمەن، بالامىزدى كوڭىل قالۋدان ساقتاعىمىز كەلۋى دە قالىپتى ارەكەت. بالا ومىردەن ءالى تالاي تاياق جەيتىنىن بىلمەيدى. دۇنيە الما كەزەك ەكەنىن ۇعىندىرىڭىز. بۇل جەڭىلۋگە دايىن بول دەگەن ءسوز ەمەس. تەك جەڭىلگەندە بەرىلمەۋ كەرەكتىگىن ۇيرەتۋ.

وزگەگە كومەكتەسۋگە مۇمكىندىك بەرىڭىز. كومەكتەسۋگە مۇمكىندىك بەرۋ مەن كۇشتەپ جۇمساۋدىڭ ايىرماسى جەر مەن كوكتەي. مۇمكىندىك بەرۋ - جۇرەككە جىگەر وتىن بەرەدى. سول وتتان بۇكىل الەم جارىق بولادى. وزىڭىزدە وعان ۇلگى بولىڭىز. ءاردايىم كومەكتەسۋگە دايىن بولىڭىز.

اناسى ۇلىنىڭ حان سارايى بولۋى كەرەك. ۇلىڭىز ءتاي-ءتاي باسقاندا، اناسىنان ءبىر- ەكى قادام عانا الىستايدى. سوسىن قايتىپ ورالادى. تاعى دا ارىرەك جۇرەدى دە، قايتىپ كەلەدى. سۋرەت سالىپ ۇيرەنگەندە، اناسىنىڭ ماقتاعانىن كۇتەدى. ءارىپ ۇيرەنگەندە، ءبىر كىتاپتى اناسىنا 20 رەت وقىپ بەرەدى. ويتكەنى، اناسى ونى 50 رەت تىڭداۋعا دايىن. فۋتبول ويناۋدى باستاعاندا، جانكۇيەرلەر اراسىنان ءسىزدى ىزدەيدى.

اۋىرىپ قالسا، اناسىنا قوڭىراۋ شالادى. ءبىر نارسەنى بۇلدىرگەندە اناسىنان كومەك سۇرايدى. ءتىپتى، ۇلكەن جىگىت بولعان كەزدە دە ءوز سەزىمىنەن قىمتىرىلماي، اناسىنىڭ يىعىنا كەلىپ جىلاۋى مۇمكىن. ازامات اتانىپ، ءوز ءۇيى بولىپ، ۇيىندە ايەلى بولسا دا، ءسىز ونىڭ اناسى بولىپ قالا بەرەسىز. اسپانداعى كۇن سياقتى ەشقاشان وزگەرمەيتىن ماڭگىلىك جارىعى، شۋاعى، وت الاتىن پەشى ءسىز - اناسى بولاسىز

«نەگە؟ « دەگەن سۇراق قويعاندا، مىندەتتى تۇردە جاۋاپ بەرىڭىز. بىلمەسەڭىز جاۋابىن بىرگە ىزدەڭىز. ول جاۋاپتى قايدان تابا الاتىنىن كورسەتىڭىز. تۋىستاردان سۇراسىن، ينتەرنەت، ەنتسيكلوپەديادان وقىسىن. قارسى سۇراق قويىڭىز. ءوزى دە ويلانسىن. ەگەر ءوزى ۇيالاتىن سۇراق بولىپ، سىزدەن سۇراي الماسا، ول ونى قايدان تاباتىنىن بىلەتىن بولادى.

اكەسى باستى نارسەلەردى ۇيرەتسىن. ەگەر اكەسىنە بالانىڭ تاربيەسىنە ەتەنە ارالاسۋعا وراي جاراتساڭىز، بالانىڭ ساناسىندا ونىڭ اكەسى ءبارىن بىلەدى دەگەن دۇرىس تۇسىنىك قالىپتاسادى. ءسىز ءاردايىم سۇيىكتى انا بولىپ قالا بەرەسىز. ءبىراق، ۇل بالا ءۇشىن اكەنىڭ ءجونى بولەك. ول ءۇشىن اكە بارلىق سۇراقتىڭ جاۋابىن بىلەتىن ادام.

اۋدارعان شىنار ءابىلدا

namys.kz