بىلەگىنەن قۇلاق ءوسىرىپ شىعارعان سۋرەتشى

بىلەگىنە ەستۋ ورگانىن وسىرتكىزىپ شىعارعان ستەلارك ەندى ونى عالامتورعا جالعاماقشى، دەپ حابارلايدى ABC News. اۆستراليالىق قارت دەنەسىندەگى وسى ءبىر ءۇشىنشى قۇلاقتى ودان ءارى وسىرىڭكىرەپ، وعان تۇيمە ءپىشىندى ميكروفوندى جالعايدى. سوسىن ونى سىمسىز Wi-Fi ارقىلى عالامتورعا تاۋلىك بويى قوسىپ قويادى.

سۋرەتشى بىلەكتەگى قۇلاعى ارقىلى ءوزى ەستىگەن دىبىستىڭ ءبىر دە بىرەۋىن قالدىرماستان، عالامتور ارقىلى جەر- جاھانعا تاراتپاقشى ەكەن. ال ونىڭ قاي دىبىستى ناقتى قاي جەردە ءجۇرىپ ەستىگەنى جايلى اقپاراتتى GPS- مودۋلدەن تانىپ بىلۋگە بولادى.

ايتا كەتۋ كەرەك، وسىعان دەيىن ادامنىڭ ويىنا كىرىپ شىقپايتىن ارەكەتتەرگە اۋەس بۇل قارت ءوزىنىڭ باس سۇيەگىندەگى قۇلاق ەتىنە ميكروفوندى كىرىكتىرىپ كورگەن ەدى. ءبىراق ول كەزدە مۇنىسىنان تۇك شىقپاي، كىرىكتىرىلگەن تۇستاعى ەتى بۇزىلىپ، ميكروب تۇسكەندىكتەن تاجىريبەنى توقتاتقان. جالپى قۇلاقتى بىلەگىنە ءوسىرىپ شىعارۋ ءۇشىن ستەلارك 20 جىل ءومىرىن سارق ەتكەن. ونىڭ العاشقى 10 جىلىندا سۋرەتشى مۇنداي وپەراتسيانى جاساۋعا جۇرەكسىنبەيتىن دارىگەرلەر ىزدەپتى. اقىرى 2007 -جىلى ونىڭ سول قولىنا بيوپوليمەرلى تىرەك كىرىكتىرىلدى. ارتىنشا ونىڭ اينالاسىنا تەرى ءوسىپ، قان تامىرلارى پايدا بولىپتى. سۋرەتشىنىڭ ايتۋىنشا، بولاشاقتا ادامدار ءوز دەنەسىنە بوگدە زاتتاردى كىرىكتىرۋ ارقىلى دا عالامتورعا قوسىلاتىن بولادى، دەپ جازادى lenta.ru.

www.24.kz