ا. ەسىموۆ: « قازاقپارات» - حالىقارالىق دارەجەگە يە بولعان قازاقستانداعى العاشقى اقپارات قۇرالدارىنىڭ ءبىرى ءارى بىرەگەيى
قۇرمەتتى «قازاقپارات» حالىقارالىق اقپاراتتىق اگەنتتىگىنىڭ ۇجىمى!
« استانا ەكسپو-2017» ۇلتتىق كومپانياسىنىڭ اتىنان « قازاقپارات»
حالىقارالىق اقپاراتتىق اگەنتتىگىنىڭ ۇجىمىن جانە ونىڭ وقىرماندارىن 95 جىلدىق مەرەيتويىمەن قۇتتىقتاۋعا رۇقسات ەتىڭىزدەر!
« قازاقپارات» - حالىقارالىق دارەجەگە يە بولعان قازاقستانداعى العاشقى اقپارات قۇرالدارىنىڭ ءبىرى ءارى بىرەگەيى. عاسىردان استام ۋاقىت بويى اگەنتتىك ەلدىڭ تىنىس- تىرشىلىگى تۋرالى جەدەل ءارى سەنىمدى اقپارات تاراتىپ، مەملەكەتىمىزدىڭ قوعامدىق- ساياسي، الەۋمەتتىك- ەكونوميكالىق ءومىرىنىڭ كەشەگىسى مەن بۇگىنگى كەلبەتىنىڭ ايناسى، جارقىن كەلەشەگىنىڭ جارشىسى ءرولىن اتقارۋدا.
بۇگىنگى تاڭدا ماڭىزى مەن ءمانى جوعارى حالىقارالىق ەكسپو-2017 مامانداندىرىلعان كورمەسىن ەلوردامىزدا ابىرويلى وتكىزۋ باعىتىندا قارقىندى جۇمىستىڭ جۇرگىزىلىپ جاتقاندىعى بەلگىلى.
بۇل رەتتە، جاڭالىقتى جارىسا جازاتىن، ءسوزى سالماقتى، ماقالالارى ساليقالى تىلشىلەرىڭىزدىڭ ەلەۋلى ەڭبەگىن اتاپ وتكىم كەلەدى. الداعى ۋاقىتتا دا حالىقارالىق كورمە اياسىندا اتقارىلاتىن ءاربىر ءىستى جۇرتشىلىققا ۋاقىتىلى جەتكىزۋدە اگەنتتىكتەرىڭىزدىڭ ورنى ەرەكشە بولاتىندىعىنا سەنىمدىمىن.
مەرەيتويلارىڭىز قۇتتى بولسىن، قادىرلى قالامگەرلەر!
ءاربىر يگى ىستەرىڭىز وڭعا باسسىن، ويلارىڭىزعا ۇتقىرلىق، قالامدارىڭىزعا قارىم، ۇجىمدارىڭىزعا شىعارماشىلىق تابىس تىلەيمىن!
ىزگى نيەتپەن، « استانا ەكسپو-2017» ۇلتتىق كومپانياسى» ا ق باسقارما ءتوراعاسى ا. ەسىموۆ»، - دەپ جازىلعان قۇتتىقتاۋدا.
