مەكسيكالىق ەكولوگتار سارعىش ءتۇستى تاسباقالار ماسەلەسىنە الاڭداۋلى

تاسباقالاردىڭ جۇمىرتقالارىن جيناپ الۋدى ادەتكە اينالدىرعان ولار ونى جەڭسىك اس رەتىندە ساتۋعا كوشكەن. سارعىش ءتۇستى تاسباقالار جىل سايىن وسى جاعاجايعا ءجۇزىپ كەلىپ، جۇمىرتقا سالادى. ولار ابدەن وسى وڭىردە كوبەيۋگە بەيىمدەلگەن. مۇندا قوسمەكەندى جاندىكتەردىڭ مىڭداعان ۇياسى بار. ءبىراق ولاردىڭ باسىم كوپشىلىگىندە ءبىر دە ءبىر جۇمىرتقا جوق. سەبەبى جەرگىلىكتى تۇرعىندار ساۋىتتى جاندىكتەردىڭ جۇمىرتقاسىن جەردەن قازىپ الىپ، قارا نارىققا اپارىپ ساتىپ جىبەرەدى. «ەگەر جاعاجاي كۇزەتشىلەردىڭ باقىلاۋىندا بولسا، مۇنداي تابيعي اپات تۋىنداماس ەدى»، - دەيدى ەكولوگتار.

انحەل گيللەرمو، گونسالەس ەكولوگ:

- بىلتىرعا دەيىن بۇل ايماقتى ەل اسكەرى جىل 12 اي بويى قاداعالاپ كەلدى. ءبىراق ولاردىڭ بارلىعى بىردەي ەسىرتكى بيزنەسىمەن اينالىساتىن توپتارعا قارسى جۇرگىزىلىپ جاتقان وپەراتسيالارعا تارتىلىپ، باسقا شتاتقا كوشىرىلدى. وسىلايشا ءبىر ماسەلەنى شەشەمىز دەپ جۇرگەندە ەكىنشىسى پايدا بولدى.

سوراقىسى سول براكونەرلەر تاسباقانىڭ جۇمىرتقاسىن 1 دوللاردان از اقشاعا ساتىپ جاتىر. بولماشى پايداعا بولا تۇرمەگە ءتۇسىپ قالامىن دەپ تە قورىقپايدى. سەبەبى ءىلىنىپ- سالىنىپ جۇرگەن تۇرمىسى ناشار جەرگىلىكتى تۇرعىنداردىڭ بۇدان باسقا امالى جوق.

جەرگىلىكتى تۇرعىن:

- شىنى كەرەك، كۇنىمىز وسى تاسباقالارعا قاراپ قالدى. وسىدان باسقا پايدا تابۋ كوزى بولماي تۇر. ەگەر قاجەتتىلىك تۋىنداماسا، ادامدار مۇنداي سوراقىلىققا بارماس ەدى.

سارعىش ءتۇستى تاسباقالار باۋىرلاستارىنىڭ اراسىندا ەڭ ءالسىز جاندىك سانالادى. كىشكەنتاي قوسمەكەندىلەردىڭ مىڭنان ءبىرى عانا ۇزاق ءومىر سۇرەدى. ادەتتە ولاردىڭ جۇمىرتقالارىن قۇستار مەن يتتەر، قالابەردى تاڭقى شاياندار تاس تالقان ەتەدى. ەندى ولاردىڭ قاسىنا ادامدار قوسىلىپ، پوپۋلياتسياعا توسقاۋىل بولار جايت ەسەلەنە ءتۇستى.

www.24.kz