ەلدى شۋلاتقان «توقال داۋى» قايتا جالعاساتىن سەكىلدى

سوتتىڭ ۇكىمىمەن كەلىسپەگەن ولار قايرات جاماليەۆتى قولداۋ ءۇشىن «ينستاگرام» الەۋمەتتىك جەلىسىندە پاراقشا اشىپ، عالامتور ارقىلى قول جيناۋعا كىرىسكەن. ءبىر قىزىعى، بۇرىن جاس جىگىتكە تىزە باتىرعان بيزنەسمەندى جەردەن الىپ جەرگە سالعان جۇرتتىڭ ءبىرازى ەندى ونى جاقتاي قالىپتى.

ال كەيبىرەۋلەر مۇنىڭ قوعامدىق داۋ تۋدىرۋ ءۇشىن ادەيى ۇيىمداستارىلدى دەگەن پىكىر جازعان. وسى حيكايانىڭ باس كەيىپكەرىنىڭ جۇبايى ءبىزدىڭ تىلشىلەرىمىزگە ەكسكليۋزيۆتى سۇحبات بەردى.

بەينەكامەرا كورسە، الىستان قاشىپ تىلشىلەرمەن تىلدەسپەيتىن الەنا بۇل جولى ءوزى اشىلىپ سۇحبات بەردى. جاماليەۆتىڭ جۇبايىنىڭ ويىنشا، سۋديا كۇيەۋىنە تىم اۋىر جازا كەسكەن. ءارى ميللياردتارعا باعالانعان بارلىق دۇنيە- مۇلكى دە زاڭسىز تاركىلەندى دەيدى ول.

سۋديا كۇيەۋىمە ادىلەتسىز جازا كەستى. ۇزاق جىلعا قاماعانى بىلاي تۇرسىن، ەكەۋىمىز 20 جىل بويى بىرگە تاپقان دۇنيەمىزدى مەملەكەتتىڭ مەنشىگىنە وتكىزىپ تاستادى. مەن ونىڭ زاڭدى ايەلىمىن. سوت وسىنى ەسكەرىپ، مۇلىكتىڭ جارتىسىن ماعان قالدىرۋى كەرەك ەدى. بالالارىمدى ەندى قالاي اسىرايمىن؟ دەيدى جاماليەۆتىڭ جۇبايى الەنا جاماليەۆا.

جاماليەۆتىڭ ايەلى ەندى حالىقتان كومەك سۇراۋعا كىرىسكەن. «ينستاگرامدا» پاراقشا اشىپ، كۇيەۋىنە جازا كەسكەن سۋديانىڭ ۇكىمىنە قارسىلىق تانىتىپتى.

بۇدان بولەك، بۇرىن جاريالانباعان وتباسىلىق البومى دا وسى پاراقشادا. قايرات جاماليەۆتىڭ قىزدارىن قۇشاقتاپ تۇسكەن سۋرەتتەرى دە وسىندا. ءتىپتى كاسىپكەردىڭ اناسىنىڭ ەڭىرەپ جىلاعان ۆيدەوسى دا وسىندا ءجۇر.

ەلگە «توقال داۋى» دەگەن وقيعامەن تانىلعان قايرات جاماليەۆ وتكەن جۇمادا عانا 13  جىلعا سوتتالىپ، ونىڭ بارلىق دۇنيە- مۇلكى تاركىلەنگەن بولاتىن. ال وعان ءالىبي جۇماعۇلوۆتى زاڭسىز قاماۋدا ۇستاپ، ۇرىپ- سوعىپ، ءتىپتى سەكسۋالدىق سيپاتتا قىسىم كورسەتۋگە كومەكتەسكەن سىبايلاستارىنىڭ ءبىرى 12  جىلعا، ەكىنشىسى 8  جىلعا باس بوستاندىقتارىنان ايىرىلعانى ءمالىم.

وسىلايشا قايرات جاماليەۆ ەكى اي بويى جابىق رەجيمدە وتكەن سوت پروتسەسىنەن كەيىن قاتاڭ تارتىپتەگى كولونياعا قامالدى. كۇيەۋى جاتقان تۇرمەگە كەشە بارىپ قايتقان الەنا جاماليەۆا ەندى اپپەلياتسيالىق شاعىم تۇسىرمەك.

قازىر قامالعان كاسىپكەردىڭ ادۆوكاتى سوت ۇكىمىمەن تولىقتاي تانىسىپ جاتىر. سوعان قاراعاندا، كۇللى ەلدىڭ نازارى اۋعان بۇل وقيعانىڭ تەلەحيكايا سەكىلدى ساعىزشا سوزىلاتىن ءتۇرى بار.

ك ت ك ارناسى