قازاق-قىرعىز شەكاراسىنىڭ اشىلۋى ىشكى نارىقتاعى باسەكەنى كۇشەيتەدى

الماتى. قازاقپارات - قازاق-قىرعىز شەكاراسىنىڭ اشىلۋى ىشكى نارىقتاعى باسەكەنى كۇشەيتەدى. بۇل تۋرالى پىكىرىمەن ساياساتتانۋشى ءازىمباي عالي ءبولىستى.

«قىرعىزستاندا جەڭىل جانە تاماق ونەركاسىبى جاقسى دامىعان. سونداي-اق، ول - د س ۇ تولىققاندى مۇشەسى. ەندى ەكى ەل اراسىنداعى ساۋدا قاتىناسى نىعايادى. كيىم-كەشەكتەن باستاپ، اۆتوموبيلگە دەيىن قازىر قىرعىز ەلىنەن تاسىمالداپ جاتىرمىز. بۇل، ءسوز جوق، بولشەك ساۋدانىڭ دامۋىنا اكەلەدى. سوندىقتان، قىرعىز تاۋارلارى ەنىپ ءبىزدىڭ نارىقتاعى باسەكە كۇشەيەتىن بولدى. قازىر باسەكە زامانى، سوندىقتان بۇل نورمالدى قۇبىلىس. قازاقستانعا تاۋارىن وتكىزەتىن قوسىمشا نارىق ەشقاشان ارتىق ەتپەيدى»، - دەدى ساياساتتانۋشى.

ايتا كەتەيىك، قىرعىز رەسپۋبليكاسىنىڭ ەۋرازيالىق ەكونوميكالىق وداققا (ە ا ە و) مۇشە ەلدەرمەن شەكاراسىندا كەدەندىك باقىلاۋ بەكەتتەرىن الىپ تاستاۋ ءراسىمى ەرتەڭ وتەدى.

قىرعىز رەسپۋبليكاسى مەن قازاقستان اراسىندا كەدەندىك شەكارانىڭ سالتاناتتى اشىلۋ راسىمىنە ەكى ەل باسشىسى قاتىسادى.

ەسكە سالا كەتسەك، قىرعىز بيلىگى كەدەندىك وداققا كىرۋ تۋرالى شەشىمدى 2011-جىلدىڭ كوكتەمىندە قابىلداعان بولاتىن. 2014-جىلدىڭ جەلتوقسانىندا ماسكەۋدە تاراپتار رەسپۋبليكانىڭ ە ا ە و- عا قوسىلۋى تۋرالى كەلىسىمگە، ال مامىردا ونىڭ ءۇش حاتتاماسىنا قول قويدى.

اۆتور: گۇلميرا عوسمانالي