قاجىلىققا بارۋ قۇجاتتارىن قابىلداۋ جالعاسۋدا

قازاقستان مۇسىلماندارى ءدىني باسقارماسى قاجىلىق پارىزىن وتەۋگە نيەت بىلدىرگەن وتانداستارىمىزدى اللانىڭ قوناعى بولۋعا شاقىرادى، دەپ حابارلايدى ق م د ب- نىڭ باسپا ءسوز قىزمەتىنەن.

«بيىل تۇڭعىش رەت استانا، الماتى، شىمكەنت قالالارىنان جيددا (ياعني، مەككە قالاسىنا) باعىتى بويىنشا تىكەلەي رەيس اشىلدى. بۇل - قازاقستان قاجىلارى ءۇشىن مول مۇمكىندىك، ۇلكەن جەڭىلدىك. پايعامبارلار اتاسى يبراھيمنىڭ (ع. س. ) ءىزى قالعان، قۇتتى مەكەن، قاسيەتتى جەر، جاراتۋشىنىڭ نۇرى جاۋعان مەككە مەن ءمادينا شاھارىن زيارات ەتۋگە اسىعايىق، باۋىرلار!»، دەلىنگەن حابارلامادا.

بيىلعى قاجىلىق ماۋسىمى قىركۇيەك ايىنىڭ 11 ىنەن باستالىپ، قازان ايىنىڭ 15 ىندە اياقتالادى. ال 24 -قىركۇيەكتە ۇلىق مەيرام قۇربان ايت مەرەكەسى باستالادى.

ساۋد ارابياسى قاجىلىق مينيسترلىگىنىڭ بەكىتكەن ەرەجەلەرى بويىنشا قاجىلىق ساپارىنا قاتىستى قۇجاتتاردى قابىلداۋ 25 -تامىزعا دەيىن جالعاسادى. بيىلعى قاجىلىق ماۋسىمىنىڭ ەڭ قىسقا مەرزىمى - 13 كۇن. بۇدان دا ۇزاق مەرزىمدى تاڭدايتىن ازاماتتار ءۇشىن 28 كۇنگە جوسپارلانعان ارنايى رەيستەر اشىلعان.

جىلداعى ءداستۇر بويىنشا ق م د ب قاجىلىق ميسسياسىنىڭ مۇشەلەرى - بىلىكتى، جوعارى ساناتتاعى دارىگەرلەر قاجىلارىمىزدىڭ دەنساۋلىعىن 24 ساعات بويى باقىلاسا، 30 دان استام ءدىنتانۋشى- عالىمدار مەن تاجىريبەلى يمامدار ۇلى ساپاردا تۋىنداعان سۇراقتارعا جاۋاپ بەرىپ، ءدىني راسىمدەردىڭ دۇرىس اتقارىلۋىنا ءجىتى كوڭىل بولەدى.

«قاجىلىق - مۇسىلمان ۇمبەتىنىڭ بىرلىگىن ايقىندايتىن، بارشا ادامزاتتى ۇلى ماقساتقا ۇندەيتىن، پەندەنى رۋحاني كەمەلدەنۋگە باستايتىن مول مۇمكىندىكتەر مەن سانسىز ساۋاپتار ماۋسىمى. جاراتۋشى يەمىز قاجىلىق ساپارىن ابىرويمەن اتقارىپ، وتانىمىزعا ساۋاپ ارقالاپ ورالۋدى جازعاي!»، دەپ اتاپ وتىلگەن حابارلامادا.