تۇركيادا قازا تاپقان قىز ساياحاتتاۋ ءۇشىن ءبىر جىل بويى اقشا جيناعان

تۋىستارى مەن دوستارىنىڭ ايتۋىنشا، ول جولداماعا اقشا جيناۋ ءۇشىن جۇمىسقا دا ورنالاسىپتى. كوپتەن كۇتكەن دەمالىس قايعىلى جاعدايمەن اياقتالدى، - دەپ حابارلايدى ك ت ك تەلەارناسى.

«اتا- اناسىنا كوڭىل ايتامىن، مەن بۇعان سەنە الار ەمەسپىن. ول ءوز اتا- اناسىن ماقتان تۇتاتىن، ءسىڭلىسىن قاتتى جاقسى كوردى. ونىڭ جوسپارلارى كوپ ەدى. الەمدى ارالاعىسى كەلدى. ول قىتايدا وقۋدى ارماندايتىن، جاقسى كوللەدجدە ءبىلىم الدى، اعىلشىنشا ەركىن سويلەيتىن»، - دەدى ايدانىڭ قۇربىسى اياگوز ءارىنوۆا.

ەسكە سالا كەتەيىك، بۇعان دەيىن تۇركياداعى ءىرى جول اپاتىنان 18 جاستاعى ايدا سارابايەۆانىڭ قازا تاپقانى حابارلانعان بولاتىن. جول اپاتى 6 -تامىزدا، استانا ۋاقىتى بويىنشا 19.30 دا بولدى. اۆتوبۋس پامۋككالەدەن انتالياعا بارا جاتقان. اپاتتان ءتورت ادام قازا تاۋىپ، 27 ادام جاراقاتتاندى.

ق ر س ءى م حابارلاۋىنشا، وسى اۆتوبۋستا بولعان قازاقستاندىق التى ازامات ءتۇرلى جاراقاتپەن دەنيزلي اۋرۋحاناسىنا جەتكىزىلدى. قازا تاپقان قىزدىڭ دەنەسى اپتا سوڭىنا دەيىن قازاقستانعا جەتكىزىلەدى.