شاشتىڭ ءتۇسۋىن قالاي توقتاتۋعا بولادى؟
بۇنىڭ سەبەبى دە سان الۋان، ول ادامنىڭ دەنساۋلىعىنا، تاماقتانۋىنا، قورشاعان ورتانىڭ اسەرى مەن كۇندەلىكتى پايدالانىپ جۇرگەن سۋسابىنىنا دا بايلانىستى بولۋى مۇمكىن، دەپ حابارلايدى BNews.kz ءتىلشىسى.
ەگەر دۇكەن سورەلەرىندە سامساپ تۇرعان سۋسابىن مەن شيپاماي شاشىڭىزدىڭ ءتۇسۋىن توقتاتا الماي جاتسا، وندا ءۇي جاعدايىندا شاشىڭىزدى «قۇتقارىپ» كورىڭىز.
بىرىنشىدەن، دەنساۋلىعىڭىز ناشارلاپ، اعزاڭىزدىڭ السىرەگەنىن سەزسەڭىز، كوكونىس پەن جەمىس-جيدەك كوپ جەڭىز، ويتكەنى شاش اعزاعا س، ە، F دارۋمەندەرىنىڭ، تەمىر مەن امين قىشقىلدارىنىڭ جەتىسپەۋىنەن دە ءتۇسۋى مۇمكىن.
ەكىنشىدەن، قورشاعان ورتاعا دا ءمان بەرىڭىز، شاش كۇنگە كۇيەدى، جەل مەن شاڭدى دا «كورەدى». سوندىقتان، شاش السىرەمەس ءۇشىن اپتاپ ىستىقتا باس كيىم كيىپ، شاشتىڭ ۇشتالعان جانە كۇيگەن جەرلەرىن قيعىزىپ وتىرۋ قاجەت.
ۇشىنشىدەن، سۋسابىندى تاڭداۋدا مۇقيات بولىڭىز. ولاردىڭ قۇرامىندا ءتۇرلى حيميالىق زات پەن بوياۋدىڭ بولاتىنى بارلىعىنا ءمالىم. سۋسابىندار مەن باسقا شاشقا ارنالعان جۋعىش زاتتار سان الۋان، ولاردى ءيىسى، قويۋلىعى، ءتۇسى مەن شاش تۇرىنە قاراي تاڭداپ الۋعا بولادى.
دەگەنمەن، تۇراقتى تۇردە ءبىر زاتتى پايدالانباي، ولاردى الماستىرىپ وتىرعان دۇرىس. جانە شاشتى كۇن سايىن جۋىپ، ءجيى بوياعان دا زيان ەكەن. شاشىڭىزعا اق تۇسپەسە، مۇلدەم بوياماي-اق قويىڭىز، سەبەبى مامانداردىڭ ايتۋىنشا، بوياعان سايىن شاشتىڭ تابيعي جىلتىرى كەتىپ، ول كەرىسىنشە رەڭىن جوعالتا تۇسەدى.
تورتىنشىدەن، شاشتىڭ كۇتىمى دۇكەن سورەلەرىندەگى زاتتارمەن شەكتەلمەۋى كەرەك. ءتۇرلى پايدالى شوپتەر، اتاپ ايتساق، تۇيمەداق، جولجەلكەن، سالبەن، كيىكوتى قايناتپالارىمەن شاشىڭىزدى شايىپ وتىرساڭىز، جارناماداعىداي جىلتىراپ شىعا كەلەدى. سونداي-اق، شاشقا، اسىرەسە ونىڭ تۇبىنە جۇمىرتقانىڭ سارىسىن، ايران، ءتۇسسىز قىنا، ۇپىلمالىك پەن وشاعان مايلارىن شاش جۋعان سايىن كەزەكتەپ، جاعىپ وتىرساڭىز، اسەرىن بىردەن بايقايسىز. شاشىڭىز از ءتۇسىپ قانا قويماي، ەرەكشە جىلتىراپ، ساۋ كورىنىپ، جىلدام وسەتىن بولادى.
بەسىنشىدەن، شاش ۇلگىسىن جاساعاندا فەنمەن قاتتى كەپتىرۋگە بولمايدى، اسىرەسە ونى شاشتىڭ تۇبىنە تىم جاقىنداتپاعان دۇرىس. كەپتىرگىش قۇرالدى ءجيى قولدانعان دا زيان ەكەن. جانە دە كەپپەي تۇرىپ شاشتى قاتتى ءتۇيىپ، تاراماۋ كەرەك.
