اقتوبەلىك ستۋدەنت مۇگەدەك اپكەسى ءۇشىن بالا ۇرلادى

وقيعا 2015 -جىلى 25 -مامىردا اقتوبەدە بولعان. قازىر بالا ۇرلاۋعا قاتىستى ءىس سوتتا قارالىپ جاتىر.

سوت وتىرىسىندا ايىپتالۋشىنىڭ ايتقان مالىمدەمەسى بويىنشا، اپكەسى بوسانعاننان كەيىن بالاسىن جوعالتىپ العان، كەيىن ونىڭ ءتىرى جانە باسقا وتباسىندا تاربيەلەنىپ جاتقانى انىقتالدى. بۇل مالىمەتتى، جىگىتتىڭ ايتۋىنشا، «مەيىربيكە» تەلەفون ارقىلى حابارلاپتى.

وسىدان كەيىن ول مەكەنجايى ايتىلعان ايەلگە بارىپ، ول جەردە تۇراتىن ادامداردى باقىلاي باستاعان. 25 -مامىردا زارداپ شەككەن ايەل نەمەرەسىمەن سەرۋەندەپ ءجۇرىپتى. ونىڭ ارتىنان بىرەۋ كەلىپ، تەمىر قۇبىرمەن باسىنان بىرنەشە رەت ۇرىپ، بالانى الىپ قاشىپ كەتكەن. ايەل ءبىرقاتار ۋاقىتتان كەيىن ەسىن جيىپ، ءوتىپ بارا جاتقانداردى كومەككە شاقىردى. اقىرى كۇدىكتىنى تاكسي جۇرگىزۋشىسى ۇستادى.

ءشارىپوۆ سوتتا بۇل ارەكەتكە بارماي تۇرىپ، ونىڭ اقىرى نە بولار دەپ ويلاماعانىن ايتتى، ول ءبىرىنشى كەزەكتە ارباعا تاڭىلعان مۇگەدەك اپكەسىن عانا ويلاعان. «مەن ءوز كىنامدى مويىندايمىن جانە دۇرىس ىستەمەگەنىمدى تۇسىنەمىن. اپكەم بالاسىن 2014 -جىلى دۇنيەگە اكەلدى، باسىندا ءبارى جاقسى بولدى، ءبىراق كەيىن شەتىنەپ كەتتى. ونى بىزگە ءمايىتحانادان اكەلىپ بەردى، جەرلەدىك، ساداقا بەردىك. 6-7 ايدان كەيىن اپكەمە جاسىرىن نومەردەن بىرەۋلەر حابارلاستى. بوتەن ايەل ءوزىن مەيىربيكەمىن دەپ تانىستىردى جانە بالانىڭ ءتىرى ەكەنىن ايتىپ، ول تۇرىپ جاتقان مەكەنجايدى اتادى. ول بارلىعىن ماعان ايتىپ بەردى، باسىندا سەنبەدىم. ءبىراق ونىڭ كوز جاسىن كورۋ اۋىر ءتيدى، سوندىقتان بارىپ، بالانىڭ قايدا تۇراتىنىن كورۋگە شەشىم قابىلدادىم. باسىندا ءۇيدى باقىلادىم، سول ۇيدەن ايەل بالامەن بىرگە سەرۋەنگە شىقتى. سول بالا ەكەن دەپ ويلادىم»، - دەدى ول.

سامال ءشارىپوۆا ءىنىسى بالا ۇرلاۋعا دەيىن بارادى دەپ ويلاماعانىن ايتتى. «ونىڭ قانداي بولعانىن، قالاي وسكەنىن كورگىم كەلدى. باسىندا ىنىمە: «مەن ونى يىسكەيمىن، كورەمىن، سودان كەيىن اپارىپ بەرەسىڭ دەدىم. ءبىراق ازامات مۇندايعا بارادى دەپ، اقىرى نە بولادى دەپ ويلامادىم»، - دەيدى ول.

ءوز كەزەگىندە زارداپ شەككەن ايەل جىگىتتى كەشىردى. ونىڭ ايتۋىنشا، ول جىگىتتى ءۇيدىڭ جانىنان 6-7 رەت كورگەن، ول جاڭبىردا دا، ىستىقتا دا ءجۇرىپتى. ول ۇنەمى ايەلدى مۇقيات باقىلاعان، الايدا ول ءمان بەرمەپتى. «ولار اپكەسىمەن بىرگە بىزدەن كەشىرىم سۇراۋعا كەلگەن. مەن ولاردى كەشىردىم، ماعان ءمورالدىق، ماتەريالدىق وتەماقى كەرەك ەمەس. نەمەرەم امان-ساۋ، سول كۇنى قايتارىپ بەرىلدى. بالانىڭ اناسى جىگىتكە كەشىرىم بەرگىسى كەلمەيدى، بۇل وعان زور كۇيزەلىس اكەلدى. ول مەنىڭ شۇيدەمنەن ۇرعاندا مەن ءولىپ، ال ول بالانى ۇرلاپ اكەتەتىن ەدى»، - دەدى ول.

ايتا كەتەيىك، سوتتا مەديتسينالىق قىزمەتكەرلەر دە سويلەدى. ولاردىڭ مالىمەتىنشە، ءشارىپوۆانىڭ ۇلى شالا ءارى كەمىس بولىپ تۋىلعان. ول بار بولعانى توعىز ساعات ءومىر ءسۇرىپتى. سونىمەن قاتار، بالالاردىڭ تۋىلعان كۇندەرى دە سايكەس كەلمەيدى - سامال قازاندا بوسانعان، ال ۇرلانعان بالا وتكەن جىلدىڭ شىلدەسىندە تۋىلعان ەكەن.