ۇلى ابايدىڭ ءومىرى مەن شىعارماشىلىعىنا ارنالعان ەنسيكلوپەديالىق پورتالدىڭ تۇساۋى كەسىلدى
مەملەكەتتىك ءتىلدى دامىتۋ قورى جاساعان پورتال قازاقستان رەسپۋبليكاسىنىڭ پرەزيدەنتى ن. ءا. نازاربايەۆتىڭ باستاماسىمەن ءوزىنىڭ «جىبەك جولى» بەيبىتشىلىك سىيلىعىنا العان قارجىسىنا ازىرلەندى. ەلباسى وسى اتالعان سىيلىقتىڭ ءبىر بولىگىن الەۋمەتتىك جوبالاردى جۇزەگە اسىرۋ ءۇشىن قورعا بەرگەن بولاتىن. سول جوبالاردىڭ ءبىرى www.abaialemi.kz پورتالى بولىپ وتىر.
تۇساۋكەسەر راسىمىنە قوعام قايراتكەرلەرى، اقىن-جازۋشىلار قاۋىمى، تۇركىتانۋشىلار، تاريحشىلار، عالىمدار، اباي شىعارمالارىنىڭ اۋدارماشىلارى جانە الىس- جاقىن شەت ەلدەردەن كەلگەن قوناقتار قاتىستى.
سالتاناتتى شارا بارىسىندا ۇلى اقىننىڭ شىعارماشىلىعى مەن ومىرىندەگى بۇعان دەيىن بەلگىسىز بولىپ كەلگەن جايتتارعا ارنالىپ قوردىڭ ارنايى تاپسىرىسىمەن تۇسىرىلگەن «ابايدىڭ ۇلى جۇمباعى» اتتى جاڭا رۋحاني- اعارتۋشىلىق دەرەكتى فيلم كورسەتىلدى.
www.abaialemi.kz ونلاين پورتالىندا ۇلى اباي ءداۋىرى، ونىڭ ءىزباسارلارى تۋرالى مالىمەت، ابايتانۋ ەڭبەكتەرى، زامانداستارىنىڭ ەستەلىكتەرى، ابايعا ارنالعان شىعارمالار، ت. ب. بار. پورتالدا ءتۇرلى اقپارات كوزدەرىنەن (كىتاپتار، گازەت- جۋرنالدار، عىلىمي باسىلىمدار، دەرەكتى فيلمدەر، فوتو مۇراعاتتار، ت. ب) الىنعان دەرەكتەر ورنالاستىرىلعان.
پورتالداعى قازاق، لاتىن جانە اراب تىلدەرىندەگى اقپارات مىناداي بولىمدەر بويىنشا ورنالاسقان: ابايدىڭ ءومىربايانى، شىعارماشىلىعى، اباي الەم تىلدەرىندە، اباي ولەڭدەرى، اباي تۋرالى ەستەلىكتەر، ابايتانۋ، ابايتانۋشى- عالىمدار، «اباي جولى» ەپوپەياسى، ەستەلىك جەرلەر، اباي مۇراجايى، فوتوگالەرەيا.
ءىس- شارا سوڭىندا مەملەكەتتىك ءتىلدى دامىتۋ قورىنىڭ ديرەكتورى ازات شاۋەيەۆ: «ءبىزدىڭ قور قازىرگى زامان مۇمكىنشىلىكتەرىن پايدالانا وتىرىپ، الەمنىڭ قاي تۇكپىرىنەن بولماسىن قازاقتىڭ جازبا ادەبيەتىنىڭ نەگىزىن قالاعان تۇلعا تۋرالى اقپارات الۋعا تىلەك بىلدىرگەن ادامنىڭ قاجەتتى مالىمەتتى تابۋىنا مۇمكىندىك بەرەتىن وسىنداي تۇڭعىش ينتەرنەت- پورتالدى ىسكە قوسىپ وتىر»، - دەپ اتاپ ءوتتى.
سونداي- اق ول اتالعان پورتالدىڭ جاس جەتكىنشەكتەر، ستۋدەنتتەر، ابايتانۋشى- عالىمدار، اباي شىعارمالارىن وزگە تىلگە اۋدارىپ جۇرگەن اۋدارماشىلار، ابايدىڭ رۋحاني مۇراسىنا قىزىعۋشىلىق بىلدىرگەن عالامتور جۇيەسىندەگى بارلىق پايدالانۋشىلار ءۇشىن اسا ماڭىزدى ەكەنىن ايتتى.
