التىن مەدالعا قول جەتكىزۋگە ءسال عانا ۋاقىت جەتپەي قالدى - ب. بەكبولات ۇلى
قازاقستاندىق ءتورت وقۋشىنىڭ ءۇش كۇمىس، ءبىر قولا مەدالعا قول جەتكىزگەندەرى بەلگىلى.
سولاردىڭ ءبىرى، بيىل اقتاۋ قالاسىنداعى قازاق-تۇرىك ليتسەيىن ءتامامداعان، 18 جاستاعى بەكجان بەكبولات ۇلى «قازاقپارات» تىلشىسىنە بەرگەن سۇحباتىندا التىن مەدالعا قول جەتكىزۋگە ازعانا عانا ۋاقىت جەتپەي قالعانىن ايتتى.
«وكىنىشكە وراي، ازعانا عانا ۋاقىت جەتپەي قالدى. ويتكەنى، تاپسىرمالاردى ورىنداۋ بارىسىندا بولمايتىن جەردەن، كىشىگىرىم قاتەلىكتەر جىبەرىپ الدىم. سولاردى تۇزەيمىن دەپ كوپ ۋاقىتىم كەتتى. تاعى 25-30 مينۋت بولعاندا التىنعا قول جەتكىزەر ەدىم. ال تاپسىرمالار كۇردەلى بولدى. كوبىنەسە لوگيكاعا نەگىزدەلگەن»، - دەدى ب. بەكبولات ۇلى.
سونىمەن قاتار ول، بۇل وليمپياداعا بەس جىل بويى دايىندالعاندىعىن جەتكىزدى.
«ليتسەيدە جەتىنشى سىنىپتا ءار ءتۇرلى پاندەردەن ەمتيحان تاپسىردىق. سوندا ءار ءپاننىڭ مۇعالىمدەرى سول ەمتيحانداردىڭ ناتيجەلەرى بويىنشا وزدەرىنە وقۋشىلار تاڭداپ، ولاردى وليمپيادالارعا دايىنداي باستادى. مەن ينفورماتيكاعا ءتۇستىم. كەيىن ەسەپ شىعارىپ جۇرگەندە بۇل ءپان ماعان قاتتى ۇنادى. سول كەزدە الماتىدا 2015-جىلى يفورماتيكادان حالىقارالىق وليمپيادانىڭ بولاتىندىعىن ەستىدىم. سودان باستاپ دايىندالدىم. مىنە، كۇمىس مەدال ەنشىلەدىم. ەندى ۋنيۆەرسيتەتكە ءتۇسىپ، ستۋدەنتتىك وليمپيادالاردا ودان دا جوعارى ناتيجەگە قول جەتكىزىپ، ەلىمىزدىڭ نامىسىن قورعاعىم كەلەدى»، - دەدى ب. بەكبولات ۇلى.
ايتا كەتەلىك، وليمپيادا ەكى تۋردان تۇردى. ءار تۋردا وقۋشىلار بەس ساعاتتىڭ ىشىندە ءۇش تاپسىرمادان ورىندادى.
اۆتور: جاپپاربەرگەن ايبوتا
