پروكۋرورمەن سوتتاسقان جۋرناليست اقتالدى

سوت وڭتۇستىك قازاقستان وبلىسى شاردارا اۋدانىنىڭ پروكۋرورى تالعات سەيدۋاليەۆتىڭ ءجۋرناليستىڭ ۇستىنەن تۇسىرگەن شاعىمىن قاناعاتتاندىرمادى.

بۇگىنگى سوت وتىرىسىندا «Central Asia Monitor» گازەتىنىڭ ءتىلشىسى رامزيا يۋنۋسوۆاعا سوڭعى ءسوز بەرىلدى. جۋرناليست 2015 -جىلدىڭ 25 -مامىرىندا جارىققا شىققان «پروكۋروردىڭ ميلليوندارى» اتتى ماقالاسىن ناقتى دەرەك كوزدەرىنە سۇيەنىپ جازعانىن ايتىپ، سوتتان ءوزىن اقتاۋدى سۇرادى.

ال جابىرلەنۋشى پروكۋروردىڭ سەنىمدى وكىلى ءارى ادۆوكاتى ماحمۋت اقبايەۆ ازاتتىققا رامزيا يۋنوسوۆانىڭ «پروكۋروردىڭ ميلليوندارى» اتتى ماقالاسىندا كەلتىرگەن دەرەكتەردى جالعان دەپ سانايتىنىن ايتتى.

ءبىراق سۋديا ماديار ءابدىراسيلوۆ پروكۋرور تالعات سەيدۋاليەۆتىڭ جۋرناليست رامزيا يۋنۋسوۆانىڭ «پروكۋروردىڭ ميلليوندارى» اتتى ماقالاسى ءۇشىن ۇستىنەن جازعان شاعىمى نەگىزىندە، قىلمىستىق كودەكستىڭ 130-بابىنىڭ 2-تارماعى بويىنشا قوزعالعان قىلمىستىق ءىستى نەگىزسىز دەپ تاپتى.

«ىستە قىلمىستىق ارەكەتتىڭ بولماۋىنان جۋرناليست كىناسىز دەپ تانىلسىن» دەدى سۋديا.

«پروكۋروردىڭ ميلليوندارى» ماقالاسىندا جۋرناليست «جەرگىلىكتى بانكتەن نەسيە الىپ، ونى دەر كەزىندە قايتارا الماعان لاۋازىمدى تۇلعانىڭ قوماقتى سومانى از ۋاقىتتا قايدان الۋى مۇمكىن ەكەنىن» بىلگىسى كەلگەن.