ىلە الاتاۋى ۇلتتىق ساياباعىنىڭ ەتەگىندە «ماڭگىلىك ەل» حالىقارالىق فەستيۆالى ءوتتى - فوتو
مەملەكەتتىك-جەكە مەنشىك سەرىكتەستىك نەگىزىندە ۇيىمداستىرىلعان شارا بىرتەكتى مادەني كەڭىستىكتى ۇلعايتۋ مەن نىعايتۋ، ۇلتتىق مادەني داستۇرلەردى، رۋحاني قۇندىلىقتاردى دامىتۋ، ەلجاندىلىققا تاربيەلەۋ، سونىمەن قاتار ۇلتتىق ات سپورتى ويىندارىن دامىتۋعا باعىتتالدى، دەپ حابارلايدى الماتى وبلىسى اكىمىنىڭ باسپا ءسوز قىزمەتىنەن.
فەستيۆال باعدارلاماسىندا قولونەر بۇيىمدارىنىڭ كورمەسى، حالىق مۋزىكاسىنان كونسەرت، سونىمەن قاتار تىلەك بىلدىرگەندەر تەرىمەن، بىلعارىمەن، كۇمىسپەن، توپىراقپەن، اركىم قالاعان ماتەريالىمەن جۇمىس ىستەپ كورۋگە مۇمكىندىك العان ءتۇرلى شەبەرلىك ساعاتتارى وتكىزىلدى.
سونداي-اق شارا شەڭبەرىندە قازاقستان، قىرعىز، تۇركيا، موڭعوليا، كورەيا، تۇركىمەنستان، بولگاريا جانە ۆەنگريا ەلدەرى وكىلدەرىنىڭ قاتىسۋىمەن ءداستۇرلى ساداق اتۋدان II حالىقارالىق فەستيۆال، «تۋرۋل» اڭشىلىق قۇستارى فەستيۆالى جانە ات سپورتى ويىندارى ءوتتى.
ۇيىمداستىرۋشىلاردىڭ ايتۋىنشا، فەستيۆال اياسىندا جاسالعان ەتنواۋىل ءتۇرلى شارالاردىڭ باسىن بىرىكتىرىپ، قازاق حالقىنىڭ ءتۇرلى تۇرمىستىق جانە مادەني داستۇرلەرىمەن تانىسۋعا مۇمكىندىك بەردى.
