س. سايلاۋبەكتىڭ كونسەرتىندە ءورت شىقتى

استانا. قازاقپارات - حالىققا تەگىن ونەر كورسەتىپ جۇرگەن ءانشى سەرىكبول سايلاۋبەكتىڭ ەسىك قالاسىندا بەرگەن كونسەرتىندە ءورت شىقتى.

وسى ورايدا ماسەلەنىڭ ءمان-جايىن ءانشىنىڭ PR- مەنەدجەرى رينات ءتاتتىبايدان سۇراپ، تولىعىراق بىلگەن ەدىك، دەپ جازادى baistars.kz.

«سەرىكبول 24- شىلدە كۇنى ەسىك قالاسىنىڭ ورتالىق الاڭىندا تەگىن كونسەرت بەرگەن بولاتىن. ونىڭ ءاربىر كەشىنەن سوڭ مىندەتتى تۇردە وتشاشۋ اتىلادى. سول كۇنى وتشاشۋ دۇرىس اتىلماي، الاڭ جانىنداعى ءبىر ءۇيدىڭ ءشوپ جينالعان قوراسىنا ءتۇسىپ كەتىپ، ءورت شىققان. ءبىراق، بارلىعى دەر كەزىندە ءوشىرىپ ۇلگەرگەن. اللا ساقتاپ، زارداپ شەككەن ادام جوق. وتشاشۋعا سەرىكبولدىڭ شىڭعىس دەگەن ءىنىسى جاۋاپتى بولعان. ءۇي يەسى ءتۇسىنىپ، ۇيىمداستىرۋشىلاردى كەشىردى.

وسى وقيعادان كەيىن سەرىكبول قاتتى قورقىپ قالعانىن جانە كەش بەرۋدىڭ وڭاي ەمەس ەكەنىن ايتىپ وتىر. بۇل ونىڭ گاسترولدىك ساپار كەزىندەگى ەكىنشى ءساتسىز وقيعاسى بولدى. وسىنىڭ الدىندا توپار اۋىلىندا بولعان كونسەرتتەن كەيىن ارىپتەستەرى ۇمىتىپ كەتىپ، تۇندە 30 كيلومەتر جاياۋ جۇرۋىنە تۋرا كەلگەن. ولار ءاربىر كەشتەن سوڭ ۋاقىتتىڭ تىعىزدىعىنا بايلانىستى اسىعىپ، تەزدەتىپ شىعۋعا تىرىسادى. سول كەزدە جانىنداعىلار ونىڭ جانكۇيەرلەرىمەن سۋرەتكە ءتۇسىپ جاتقانىن بايقاماي، قالدىرىپ كەتكەن.

مىنە، وسىنداي جاعدايلار بولدى. دەگەنمەن، ول جىلدىڭ سوڭىنا دەيىن ەلىمىزدى ارالاپ شىعۋدى جوسپارلاپ وتىر. بۇگىنگى شامالعاندا بولعان كونسەرتىنە 3000 ادام كەلىپتى»، - دەدى رينات ءتاتتىباي.