وڭتۇستىك كورەيا ەلدە كوروناۆيرۋس دەرتى تارالۋىنىڭ اياقتالۋى تۋرالى جاريالادى
بۇل تۋرالى ەلدىڭ پرەمەر-ءمينيسترى حۆان گەان مالىمدەدى، دەپ حابارلايدى ت ا س س.
«ءتۇرلى فاكتورلاردى ەگجەي-تەگجەيلى قاراستىرعان سوڭ، ۇكىمەت وكىلدەرى مەن مەديتسينالىق قىزمەتكەرلەر بۇل دەرتتىڭ ەندى ازاماتتارعا قاۋىپ توندىرمەيتىنىن تۇيىندەدى»، - دەپ اتاپ ءوتتى ول دەنساۋلىق ساقتاۋ جانە الەۋمەتتىك قامتۋ مينيسترلىگىنىڭ وكىلدەرىمەن بولعان كەزدەسۋدە.
پرەمەر حالىقتىڭ الدىندا ۇكىمەتتىڭ اۋرۋدىڭ تارالۋىنا كەش ءمان بەرگەنى ءۇشىن كەشىرىم سۇرادى. حۆان گەان سونداي-اق ادامداردان «تەزىرەك قالىپتى ومىرگە ورالۋىن» سۇرادى. ول بيلىك كوزدەرىنىڭ ىندەت سالدارىنان شايقالعان ەل ەكونوميكاسىنىڭ جەدەل قالپىنا كەلتىرىلۋىن كەپىلدەۋ ءۇشىن قولدان كەلەتىننىڭ ءبارىن ىستەيتىنىن ايتتى.
دۇيسەنبى كۇنى ەلدە كوروناۆيرۋستى جۇقتىرۋى مۇمكىن بولعان سوڭعى پاتسيەنت ۇيدەگى كارانتيننەن شىعارىلدى. ەلدەگى ەپيدەميولوگيالىق جاعدايدىڭ كۇردەلەنۋى كەزەڭىندە ەلدە 16,7 مىڭنان استام ادام كارانتيندە بولعان.
سوڭعى 23 كۇندە ەلدە قاۋىپتى ىندەتتى جۇقتىرۋدىڭ جاڭا جاعدايلارى تىركەلگەن جوق.
ەسكە سالا كەتەيىك، وڭتۇستىك كورەيا اۋماعىندا تشرس-كوۆ اۋىرۋدىڭ ءبىرىنشى وقيعاسى 20- مامىردا تىركەلگەن. ۆيرۋستى تاياۋ شىعىس ەلدەرىنە ساپار جاساپ ەلگە ورالعان كورەيا ازاماتى جۇقتىرعانى انىقتالدى.
تاياۋشىعىستىق رەسپيراتورلىق سيندروم (Middle East Respiratory Syndrome, MERS) - Betacoronavirus تەكتى ۆيرۋستىڭ جاڭا ءتۇرى تۋدىرعان تىنىس الۋ مۇشەلەرىنىڭ قابىنىپ اۋرۋى. العاش بۇل اۋرۋدى جۇقتىرۋ جاعدايى 2012-جىلى ساۋد ارابياسىندا تىركەلدى.
2012-جىلدىڭ قىركۇيەك ايىنان باستاپ الەمدە بۇل قاۋىپتى دەرتتى جۇقتىرىپ الۋدىڭ 1,3 مىڭنان استام وقيعاسى تىركەلىپ، سونىڭ ىشىندە 460 تان استامى ادام ولىمىمەن اياقتالدى.
